لوگ انتظارکرتے رہے کہ شاید کوئی بچانے آئے گا، شاہد آفریدی

لاہور(اُردو پوائنٹ اخبارتازہ ترین - این این آئی۔ 28 جون2025ء)پاکستان کرکٹ ٹیم کے سابق کپتان شاہد خان آفریدی نے دریائے سوات میں ڈوبنے والے افراد کے لیے افسوس کا اظہار کرتے ہوئے کہا ہے کہ انہیں بچانے کی ذمے داری جن کی ہے ان کی ترجیحات کچھ اور ہیں۔یہ بات شاہد خان آفریدی نے اپنے ایکس اکاؤنٹ پر کیے گئے ٹویٹ میں کہی ہے۔خیال رہے کہ دریائے سوات کا سیلابی ریلہ 17 سیاحوں کو بہا لے گیا، جس سے 9 افراد جاں بحق ہو گئے، جبکہ 4 کو بچا لیا گیا۔

(جاری ہے)

عینی شاہدین کے مطابق صبح ناشتے کے بعد سیاحوں نے تصویریں لینے کے لیے دریا کے خشک حصے کا رخ کیا تھا کہ اچانک بے رحم موجوں نے انہیں گھیر لیا، لوگ جان بچانے کے لیے ٹیلے پر چڑھ گئے، مدد کے لیے پکارتے رہے، لیکن دریا کا بہاؤ اتنا تیز تھا کہ کوئی اس کے سامنے ٹھہر نہیں سکا۔اس حوالے سے پاکستانی ٹیم کے سابق کپتان شاہد خان آفریدی نے کہا ہے کہ دریائے سوات میں ڈوبنے والے معصوم لوگ آخری لمحے تک بے بسی کی تصویر بن کر یہ انتظار کرتے رہے کہ شاید کوئی انہیں بچا لے گا۔شاہد آفریدی نے کہا کہ ان لوگوں کو اندازہ نہیں تھا کہ جن کی یہ ذمے داری ہے، ان کی ترجیحات کچھ اور ہیں۔