پاکستان شاہینز کرکٹ ٹیم لاہور سے ڈارون روانہ ہوگئی

لاہور (اُردو پوائنٹ اخبارتازہ ترین - این این آئی۔ 08 اگست2025ء)دورہ آسٹریلیا کیلئے پاکستان شاہینز کرکٹ ٹیم لاہور سے ڈارون روانہ ہوگئی،محمد عرفان خان کی قیادت میں 15 رکنی سکواڈ ٹاپ اینڈ ٹی ٹوئنٹی ٹورنامنٹ کھیلے گا۔11ٹیموں کا ٹورنامنٹ 14 تا 24 اگست تک ڈارون میں کھیلا جائے گا۔شاہینز کا پہلا میچ 14 اگست کو بنگلہ دیش اے سے ہوگا۔روانگی سے قبل پی سی بی کی جانب سے اسکواڈ میں دو تبدیلیاں کردی گئی ہیں۔

(جاری ہے)

پی سی بی کے مطابق حیدر علی کی جگہ محمد فائق کو اسکواڈ کا حصہ بنایا گیا ہے جبکہ سلمان مرزا کی جگہ فاسٹ بولر محمد وسیم جونیئر کو شامل کیا گیا ہے۔واضح رہے کہ مڈل آرڈر بیٹر حیدر علی پاکستان شاہینز کا حصہ نہیں رہے کیونکہ انہیں پاکستان کرکٹ بورڈ نے انگلینڈ میں کریمنل کیس کی وجہ سے معطل کر رکھا ہے۔ذرائع کا بتانا ہے کہ سلمان مرزا کو آئندہ قومی ٹیم کے ساتھ متوقع کمٹ منٹ کی وجہ سے اسکواڈ میں برقرار نہیں رکھا گیا ہے۔خیال رہے کہ ڈارون میں ٹاپ اینڈ ٹی ٹوئنٹی سیریز 14 سے 24 اگست تک کھیلی جائے گی۔