وسیم اکرم نے اپنے دور کے ٹاپ 5 کرکٹرز کے نام بتا دیے

لوگ اکثر مجھ سے پوچھتے ہیں کہ میں نے کس بہترین بلے باز کے لیے بولنگ کی۔ میرے لیے یہ سر ویوین رچرڈز ہیں : پوڈ کاسٹ

ذیشان مہتاب جمعرات 21 اگست 2025 12:49

وسیم اکرم نے اپنے دور کے ٹاپ 5 کرکٹرز کے نام بتا دیے

لاہور (اردو پوائنٹ تازہ ترین اخبار ۔ 21 اگست 2025ء ) سابق کپتان وسیم اکرم نے اپنے دور کے ٹاپ پانچ کرکٹرز کے نام بتائے ہیں۔

انگلش ٹیم کے سابق کھلاڑیوں مائیکل وان، سر ایلسٹر کک، ڈیوڈ لائیڈ اور فل ٹفنیل کے ساتھ حالیہ پوڈ کاسٹ میں وسیم اکرم اپنے 17 سالہ کیریئر سے متعلق اظہار خیال کیا۔

بہترین بلے باز کا نام پوچھے جانے پر 59 سالہ وسیم اکرم نے ویسٹ انڈیز کے لیجنڈ سر ویوین رچرڈز کا انتخاب کیا۔

انہوں نے کہا کہ لوگ اکثر مجھ سے پوچھتے ہیں کہ میں نے کس بہترین بلے باز کے لیے بولنگ کی، میرے لیے یہ سر ویوین رچرڈز ہیں۔

سابق کپتان نے کہا کہ میں نے بہت سے دوسرے عظیم کھلاڑیوں کا بھی سامنا کیا جن میں ایلن بارڈر، گراہم گوچ، سچن ٹنڈولکر اور برائن لارا شامل ہیں۔

(جاری ہے)

وسیم اکرم نے کہا کہ سر ویوین رچرڈز 1987-88 میں اپنے کیرئیر کے اختتام پر تھے لیکن وہ سب کے ہیرو تھے۔

انہوں نے پانچ ٹاپ کرکٹرز میں عمران خان، ویوین رچرڈز، مارٹن کرو، برائن لارا اور سچن ٹنڈولکر کو شامل کیا ہے۔ سابق کپتان نے کہا کہ رکی پونٹنگ کے خلاف بہت کم کھیلا ہوں لیکن ون ڈے میں ایڈم گلکرسٹ وہ کھلاڑی تھے جنہوں نے مجھے واقعی پریشان کیا۔

کرکٹ کھیلنے کے لیے بہترین ممالک کے بارے میں پوچھے جانے پر وسیم اکرم نے انگلینڈ اور آسٹریلیا کا نام لیا۔

وقت اشاعت : 21/08/2025 - 12:49:54