ہاکی ورلڈ کپ کا آغاز کل15 اگست سے بیلجیم اور نیدرلینڈز میں ہوگا

لاہور (اُردو پوائنٹ اخبارتازہ ترین - اے پی پی۔ 14 اگست2026ء) ہاکی ورلڈ کپ 2026 کا آغاز کل15 اگست سے بیلجیم اور نیدرلینڈز میں ہوگا، جس میں پاکستان اور بھارت سمیت دنیا کی 16،16 مردوں اور خواتین کی ٹیمیں شریک ہوں گی۔میگا ایونٹ کے مینز ورلڈ کپ میں پاکستان اور بھارت کو ایک ہی گروپ میں رکھا گیا ہے، دونوں ٹیمیں 19 اگست کو نیدرلینڈز کے شہر ایمسٹلوین کے واگنر اسٹیڈیم میں مدمقابل ہوں گی۔

میچ مقامی وقت کے مطابق سہ پہر 3 بجے شروع ہوگا، جبکہ پاکستان میں شائقین یہ مقابلہ شام 6 بجے دیکھ سکیں گے۔پاکستان اور بھارت کے درمیان ورلڈ کپ میں 16 سال بعد مقابلہ ہوگا۔ دونوں ٹیمیں آخری مرتبہ 2010 کے عالمی کپ میں نئی دہلی میں آمنے سامنے آئی تھیں، جہاں میزبان بھارت نے پاکستان کو 1-4 سے شکست دی تھی۔

(جاری ہے)

عالمی کپ کی تاریخ میں پاکستان اور بھارت اب تک پانچ مرتبہ ایک دوسرے کے خلاف کھیل چکے ہیں۔

بھارت نے تین جبکہ پاکستان نے دو مقابلوں میں کامیابی حاصل کی ہے۔ 1975 کے عالمی کپ کا فائنل بھی دونوں روایتی حریفوں کے درمیان کھیلا گیا تھا، جس میں بھارت نے پاکستان کو 1-2 سے شکست دے کر ٹائٹل اپنے نام کیا تھا۔پاکستان عالمی کپ کی تاریخ میں چار مرتبہ چیمپئن بن چکا ہے۔ قومی ٹیم نے 1971، 1978، 1982 اور 1994 میں عالمی اعزاز حاصل کیا، جبکہ بھارت نے 1975 میں ایک مرتبہ ورلڈ کپ جیتا تھا۔

2026 کے عالمی کپ میں روایتی کوارٹر فائنل مرحلے کے بجائے نیا فارمیٹ متعارف کرایا گیا ہے۔ ابتدائی پول مرحلے کے بعد ٹیموں کو کراس اوور پولز میں تقسیم کیا جائے گا، جہاں مزید تین، تین میچز کھیلے جائیں گے۔ پول ای اور پول ایف کی ٹاپ دو ٹیمیں سیمی فائنل میں جگہ بنائیں گی۔پاکستان ورلڈ کپ میں اپنی مہم کا آغاز 15 اگست کو انگلینڈ کے خلاف کرے گا، 17 اگست کو ویلز سے مقابلہ ہوگا جبکہ 19 اگست کو روایتی حریف بھارت کے خلاف اہم میچ کھیلا جائے گا۔

دوسری جانب بھارت 15 اگست کو ویلز، 17 اگست کو انگلینڈ اور 19 اگست کو پاکستان کے خلاف میدان میں اترے گا۔ورلڈ کپ کے سیمی فائنلز 28 اگست کو کھیلے جائیں گے جبکہ کانسی کے تمغے کا میچ اور فائنل 30 اگست کو ہوگا۔پاکستان میں شائقین ہاکی ورلڈ کپ کے میچز ٹپ میڈ پر جبکہ بھارت میں اسٹار اسپورٹس اور جیو ہاٹ اسٹار پر دیکھ سکیں گے۔ عالمی سطح پر میچز واچ ہاکی کے ذریعے نشر کیے جائیں گے۔