ملتان (اُردو پوائنٹ اخبارتازہ ترین - اے پی پی۔ 19 اگست2026ء)
پاکستان گولڈ نے نیشنل چیمپئنز
کرکٹ کپ کا ٹائٹل اپنے نام کر لیا،
پاکستان گولڈ نے فیصلہ کن معرکے میں
پاکستان گرینز کو 101 رنز سے شکست دی۔تفصیلات کے مطابق منگل کے روز یہاں
ملتان کرکٹ اسٹیڈیم میں نیشنل چیمپئنز کپ کے فائنل میں
پاکستان گولڈ نے پہلے بیٹنگ کرتے ہوئے مقررہ 50 اوورز میں 340 رنز بنائے۔
پاکستان گولڈ کی جانب سے سعد خان نے 112 جبکہ شامیل حسین نے 111 رنز کی شاندار اور ذمہ دارانہ اننگز کھیلی
۔پاکستان گرینز کے کپتان شاداب خان،فہیم اور نسیم شاہ نے دو، دو وکٹیں حاصل کیں۔ہدف کے تعاقب میں
پاکستان گرینز کی پوری ٹیم 37.3 اوورز میں 239 رنز بنا کر آؤٹ ہوگئی۔
پاکستان گرینز کی جانب سے سعد خان 67 رنز بنا کر نمایاں بلے باز رہے۔
(جاری ہے)
پاکستان گولڈ کے کپتان شاہین شاہ آفریدی نے سات وکٹیں حاصل کیں اور فائنل میں اپنی ٹیم کی کامیابی میں فیصلہ کن کردار ادا کیا۔
یوں
پاکستان گولڈ نے فائنل میں 101 رنز کی شاندار کامیابی حاصل کرتے ہوئے نیشنل چیمپئنز کپ کا سہرا اپنے سر سجا لیا۔میچ کے بعد میڈیا سے گفتگو کرتے ہوئے
پاکستان گرینز کے آل راؤنڈر فہیم اشرف نے کہا کہ شدید
گرمی کے باوجود کھلاڑیوں نے بھرپور محنت کی تاہم میچ کا نتیجہ ہماری توقعات کے مطابق نہیں ہوا۔انہوں نے
پاکستان گولڈ کی کامیابی پر انہیں مبارکباد دیتے ہوئے کہا کہ شامیل حسین، سعد خان اور شاہین شاہ آفریدی سمیت
پاکستان گولڈ کے دیگر کھلاڑی جیت کے مستحق تھے۔
آئندہ ورلڈ کپ کی تیاری سے متعلق پوچھے گئے ایک سوال کے جواب میں انہوں نے کہا کہ ورلڈ کپ میں ابھی کافی وقت باقی ہے اور اس دوران انٹرنیشنل ، وڈومیسٹک
کرکٹ کے بہت سے میچز ہوں گے،ورلڈ کپ تک اپنی کارکردگی کو مزید بہتر بنانے پر توجہ دیں گے۔فہیم اشرف نے مزید کہاکہ ہمارے نئے کھلاڑی جو نیشنل چیمپئنز کپ کا حصہ تھے، ان سب میں
پاکستان کی نمائندگی کرنے کی صلاحیت موجود ہے، انہیں مزید مواقع اور تجربہ ملنے سے ان کی کارکردگی میں نکھار آئے گا۔
فائنل میں انفرادی کارکردگی سے متعلق پوچھے گئے سوال کے جواب میں انہوں نے کہا کہ جب آپ فائنل نہیں جیتتے توبعض اوقات آپ کی انفرادی کارکردگی بھی چھپ جاتی ہے،تاہم کھلاڑی کے لیے اہم بات اپنی غلطیوں سے سیکھنا اور آئندہ بہتر کارکردگی دکھانا ہے۔فائنل میں شاہین شاہ آفریدی کی شاندار باؤلنگ پر فہیم اشرف نے کہا کہ شاہین نے 7 وکٹیں حاصل کیں اور ان کا اسپیل سب سے مختلف رہا، انہوں نے بہترین باؤلنگ کا مظاہرہ کیا۔
فہیم اشرف نے امید ظاہر کی کہ نیشنل چیمپئنز کپ میں سامنے آنے والے نوجوان کھلاڑی مستقبل میں
پاکستان کرکٹ کے لیے اہم کردار ادا کریں گے ۔نیشنل چیمپئنز کپ فائنل میں
پاکستان گولڈ کی کامیابی کے بعد نوجوان بلے باز شامیل حسین نے میڈیا سے گفتگو کرتے ہوئے کہا ہے کہ ٹورنامنٹ کے آغاز میں ہماری
کرکٹ اتنی اچھی نہیں تھی تاہم ہمیں ایک بہترین موقع ملا اور پوری ٹیم نے اس سے بھرپور فائدہ اٹھایا۔
شامیل حسین نے کہا کہ پوری ٹیم نے شاندار پرفارمنس دی اور سب کھلاڑیوں نے اپنا کردار ادا کیا، جس کی وجہ سے فائنل جیتے۔انہوں نے کہا کہ
ملتان میں شدید
گرمی اور مشکل کنڈیشنز کے باوجود تمام کھلاڑیوں نے اپنی بہترین صلاحیتوں کا مظاہرہ کیا۔انہوں نےمزید کہا کہ نیشنل چیمپئنز کپ میں کامیابی پوری ٹیم کی مشترکہ محنت کا نتیجہ ہے، جس سے کھلاڑیوں کے اعتماد میں اضافہ ہوا ہے۔
