محمد عامر کی مہندی کی پروقار تقریب مقامی فارم ہاؤس میں منعقد ہوئی ، (کل) دولہا بنیں گے

لاہور (اُردو پوائنٹ اخبارتازہ ترین - این این آئی۔19ستمبر ۔2016ء ) قومی کرکٹ ٹیم کے فاسٹ باؤلر محمد عامر کی مہندی کی پروقار تقریب گزشتہ روز ایک مقامی فارم ہاؤس میں منعقد ہوئی جس میں ان کے عزیز و اقارب سمیت اہم شخصیات نے بھی شرکت کی ۔ محمد عامر اور ان کی منکوحہ دونوں نے سبز رنگ کے ملبوسات زیب تن کر رکھے تھے ۔ جبکہ محمد عامر کے کزنوں نے ایک ہی رنگ کے ملبوسات زیب تن کر رکھے تھے ۔

مہندی کی تقریب میں ان کے کزنوں نے خوب ہلہ گلہ کیا اور بھنگڑے ڈالے ۔

(جاری ہے)

اس موقع پر میڈیا سے گفتگو کرتے ہوئے محمد عامر نے کہا کہ میں نئی زندگی شروع کرنے جا رہا ہوں ، دعا ہے کہ اﷲ نئی زندگی میں برکت ڈالے ۔ میری منکوحہ نرجس نے ہمیشہ مجھے سپورٹ کیا ، ہرمشکل وقت میں میرے ساتھ رہی ، ان کی سوچ بہت مثبت ہے ، اپنے فینز سے درخواست کروں گا کہ میری زندگی کی نئی انگز میں کامیابی کیلئے دعاکریں ۔ محمد عامر نے کہا کہ ویسٹ انڈیزکے خلاف اچھا پرفارم کرنے کی کوشش کروں گا۔محمد عامر کل ( منگل ) دولہا بنیں گے جبکہ ان کے ولیمے کی تقریب21ستمبر کو مقامی ہوٹل میں ہوگی جس کے لئے پی سی بی حکام اورکرکٹرزکو دعوت نامے بھی جاری کیے جاچکے ہیں۔