چکوال، رکن پنجاب اسمبلی ملک ظہور انور طویل علالت کے بعد انتقال کر گئے

بدھ 22 فروری 2017 17:30

چکوال ۔ (اُردو پوائنٹ اخبارتازہ ترین - اے پی پی۔ 22 فروری2017ء) رکن پنجاب اسمبلی ملک ظہور انور تین سال کی طویل علالت کے بعد انتقال کر گئے۔ مرحوم 2013میں مسلم لیگ(ن) کے ٹکٹ پر حلقہ پی پی23چکوال چار سے رکن پنجاب اسمبلی منتخب ہوئے تھے وہ اس سے قبل 2008کے الیکشن میں بھی مسلم لیگ (ق) کے ٹکٹ پر اسی حلقے سے رکن پنجاب اسمبلی منتخب ہوئے۔

(جاری ہے)

ملک ظہور انور 2013کے انتخابات میںکامیابی کے فوراً بعد کینسر کے عارضے میں مبتلا ہوگئے اور2 سال تک امریکہ میں علاج کرواتے رہے مگر بلآخر ڈاکٹروں نے مرض کو آخری سٹیج قرار دیتے ہوئے انہیں واپس وطن بھیج دیا۔

وہ اپنے آخری ایام میں لاہور میں اپنا علاج کرواتے رہے۔ ملک ظہور انور بنیادی طور پر بیورو کریٹ تھے اور وہ گریڈ22کے وفاقی سیکرٹری کے عہدے سے ریٹائر ہوئے تھے اور اس کے بعد سیاست کے میدان میں آئے۔ 2002کے انتخابات میں مسلم لیگ (ق) کا ٹکٹ ہونے کے باوجود آزاد امیدوار کرنل سلطان سرخرو نے انہیں شکست دے دی تھی۔ ظہور اعوان سابق چیئرمین پیمرا مشتاق ملک کے بھائی تھے۔ مرحوم کو سینکڑوں سوگواروں کی موجودگی میں لاہور میں سپرد خاک کر دیا گیا۔ مرحوم کا آبائی گائوں کوٹ قاضی تحصیل لاوہ ضلع چکوال ہے۔