عربی لازمی پڑھانے کا بل ،رکوع اور ترجمہ قرآن کی تحریک

ہفتہ 6 فروری 2021

ایوان بالا میں گزشتہ دنوں تعلیمی اداروں میں عربی لازمی پڑھانے کا بل منظور کیا گیا ۔جس کا بنیادی مقصد قرآن پاک سمجھنے کی اہلیت پیدا کرنا ہے۔علاوہ ازیں اسلام سمیت مسلمانوں کی تاریخ و فلسفہ سمیت دیگر علوم کے اعلیٰ ترین خزینے عربی زبان کی کتابیں ہیں۔ جس سے استفادہ ممکن بنایا جا سکے۔مغرب کے پاس فلسفہ کے زیادہ ترعلوم عربی زبان کے تراجم سے کشید کردہ ہے۔

اہم ترین یہ بھی ہے کہ قرآن کی زبان عربی ہے۔عربی سیکھنے سے قرآن کو بہتر طریقے سے پڑھا ،سمجھا جا سکتا ہے۔
عربی زبان سے قرآن پاک کو پڑھنا،سمجھنا بھی سہل ہوجائے گا۔دینی مدارس سمیت مساجد اور گھر وں میںصرف قرآن پاک پڑھانے کو ترجیح دی جاتی ہے۔قاری حضرات اور احفاظ اکرام قرآن پڑھتے تو ہیں مگر انہیں یہ معلوم نہیں ہے کہ قرآن کی تعلیمات کیا ہیں۔

(جاری ہے)

قرآن میں کیا کہا گیا ہے۔قرآن میں ہمیں کیا تعلیم دے رہا ہے۔
عربی زبان کو بطور لازمی مضمون پڑھانا کئی پہلوؤں سے سود مند ثابت ہوگا۔بالخصوص علماء سومذہب کے حوالے سے دیدہ دلیری سے لوگوں کو گمراہ نہیں کرسکیں گے ۔ تفرقہ بازی اور دکانداریوں میں بھی فرق پڑے گا۔مذکورہ بل مذہبی جہالت دور کرنے میں بہت مدگار رہے گا۔یہ کام بہت پہلے کیا جانا بہت ضروری تھا ۔

دیر سے ہی سہی درست کیا ہے۔
پارلیمان کو مزید اقدام کرنے کی ضرورت ہے۔قرآن پاک کوترجمہ کے ساتھ پڑھانے کا قانون بھی بنانا چاہیئے اور خاص کر دینی مدرسوں کوپابند کیا جائے کہ ترجمہ کے بغیر قرآن مجید نہ پڑھایا جائے۔صرف وہی اساتذہ قرآن کی تعلیم دیں جو ترجمہ جانتے ہیں۔
قرآن پاک کا لفظی ترجمہ میں کوئی ہیر پھیر بھی نہیں کیا جا سکتا ہے۔

اگر کوئی ڈنڈی مارتا ہے تو فوری پکڑا جاتا ہے۔عمومی سطح پر ترجمہ کاری کے فن کی بجائے آسان و سہل لفظی ترجمہ کی ضرورت ہے ۔جو عام قاری سمجھ سکے اور کسی گمراہی کا شکار نہ ہو۔مولوی تفرقہ اور نفرت پر مبنی تقریریں کرتے ہوئے یہ سمجھیں کہ سننے والے بھی سمجھتے ہیںاور جواب بھی دے سکتے ہیں۔
پاکستان میں اردو ترجمہ کا رجحان جنم لے رہا ہے۔کافی ادارے قرآن پاک کے اردو ترجمہ کے فروغ کےلئے کام کررہے ہیں ۔

راولپنڈی میں نعیم عصمت ایڈووکیٹ نے 2018 میں رکوع انٹرنیشنل کے نام پر ادارہ قائم کیا ہے ۔جس کے تحت صرف اس کام پر توجہ دی جارہی ہے کہ قرآن کو سمجھ کر پڑھیں ۔ابتدا میں انہوں نے میں ہوں اندھا بہرا مسلمان کے سلوگن کے اس خیال کو اجاگر کیا کہ اگر قرآن کے معانی و مطالب کا معلوم نہیں ہے تو مسلمان اندھا بہرا ہے۔حقیقت بھی یہی ہے۔اندھی عقیدت اور جذبات کے باعث پاک سر زمین میں عدم برداشت اور شدت پسندی نے بے شمار ذہین ترین شخصیات کی جان لی ہے۔

سچائی اور درست خیالی کفر بن کر رہی ہے۔کئی بے گناہ مارے جا چکے ہیں۔
رکوع انٹرنیشنل کے قیام اور قرآن کو ترجمہ کے ساتھ پڑھانے کی تحریک پیدا کرنے کا بنیادی مقصد بھی یہی ہے کہ لوگوں میں وسعت قلبی پیدا ہو اور برداشت سے ایک دوسرے کی بات سنیں ۔تحقیق کی طرف آئیں اور درست خیالی کو اپنائیں۔محض عقیدت اور جذبات سے کام نہ لیں۔
عمومی طورپر قرآن کو سمجھنے کی بجائے محض ثواب کےلئے تلاوت کیا جاتا ہے۔

قرآن پاک کوقوانین الہیہ،دینی تعلیم کی بجائے ثوابی کتاب کے طور لیا جاتا ہے۔ کرایے پر بچے منگوا کر میت پر پڑھانے کا کلچر عام ہے۔رشوت اور ناجائز ذرائع سے کمائے ہوئے پیسے بےدریع خرچ کیے جاتے ہیں اور قرآن پڑھوا کر ثواب دارین حاصل کیا جاتا ہے۔
دسویں جماعت تک عربی پڑھنے والے طالب علم کم ازکم قرآن کاترجمہ ضرور کر سکیں گے اور قرآن کی آیات کے معانی اور مطالب سے ضرور واقف ہوجائیں گے۔اس کا بڑا فائدہ یہ ہوگا کہ مذہب کا بطور ہتھیار استعال کرنے کے رجحان میں خاطر خواہ کمی آئے گی۔مذہبی انتہاپسندی اور شدت پسندی ختم ہوگی۔

ادارہ اردوپوائنٹ کا کالم نگار کی رائے سے متفق ہونا ضروری نہیں ہے۔