"عید الاضحی کے اغراض و مقاصد"

عید الاضحی صرف ایک مذہبی تہوار ہی نہیں بل کہ ایک عظیم الشان قربانی کی یاد ہے جو ابو الانبیاء حضرت ابراہیم علیہ سلام اور حضرت اسمعیل علیہ سلام کے مابین اس  واقعے کا احاطہ کرتی ہے جس میں ابراہیم علیہ سلام اپنے بیٹے سے اس خواب کا ذکر کرتے ہیں جس میں اللہ تعالی خلیل اللہ کو اپنا بیٹا  ذبح  کرنے کا حکم دیتے ہیں . باپ کی بات سننے کے بعد حضرت اسماعیل علیہ سلام اللہ کے حضور قربان ہونے کے لیے خوشی خوشی راضی ہوجاتے ہیں .

وقت قربان نہ تو امام الناس ابراہیم علیہ سلام کے ہاتھ کانپتے ہیں اور نہ ہی تختہ دار کی طرف بڑھتے ذبیح اللہ, حضرت اسماعیل علیہ سلام کے قدم ڈگمگاتے ہیں. عین قربانی کے وقت تختہ دار پر رب کے حکم سے حضرت اسماعیل علیہ سلام کی جگہ  دنبہ آجاتا ہے اور حضرت ابرہیم علیہ سلام کو قربانی قبول ہونے کی بشارت ملتی ہے . یہ ہے تابعداری  اطاعت اور بندگی کا وہ عظیم جذبہ جس نے پیغمبروں کو باقی انسانوں سے الگ اور اونچا رتبہ عطا کیا اور اسی کی یاد میں حج بیت اللہ کے ساتھ بکرے, دنبے یا اونٹ کی قربانی فرائض حج  میں شامل ہوگئی .اسی حوالے سے اسے سنت ابراہیمی بھی کہتے ہیں.
مگر افسوس مسلمان ہونے کے ناطے  ہمیں سنت ابراہیمی ادا کرنا تو  یاد ہے مگر اس کے پیچھے کے اغراض و مقاصد ہم بھول گئے ہیں .

ہم ہر عید کو بہت ہی پرجوش انداز میں قربانی  کے لیے مہنگے سے مہنگا اور خوبصورت جانور خریدنے کی کوشش کرتے ہیں .قربانی کرتے وقت خود کو قابل فخر سمجھتے ہیں مگر یہاں سوال یہ پیدا ہوتا ہے کہ کیا اللہ تعالی کو یہ عمل پسند آئے گا کہ ہم دکھاوے  کے لیے لاکھوں میں جانور خریدیں . خود کو معتبر اور باقیوں کو حقیر جانیں. مگر مجھے نہیں لگتا کہ مہنگا جانور خریدنا قربانی کے بنیادی اصولوں میں سے ایک اصول ہے .

اس سے بہتر ہے کہ ایک اچھا جانور جو  قربانی کے معیار پر پورا اترے قربان کرکے باقی پیسوں سے آس پاس کسی بھی سفید پوش ضرورت مند کی مدد کی جائے اس سے قربانی بھی قبول ہوگی اور کسی کے گھر فاقے بھی ختم ہوجائیں گے.
آج کے دور میں قربانی کا جانور خریدنے کے ساتھ ساتھ سب کو اپنے  ڈیپ فریزر اور فرج کی بھی فکر ہونے لگتی ہے . اور گوشت کا زیادہ تر حصہ ان کی نذر ہوجاتا ہے .

اس طرح قربانی کا بنیادی مقصد بالکل ختم  ہوجاتا ہے.
     عید الاضحی منانے اور قربانی کرنے کے لیے سب سے اہم بات اس کے اغراض و مقاصد سے پوری طرح آشنا ہونا اور  ان پر عمل کرنا  ہے. قربانی کا سب سے پہلا اور اہم مقصد تو یہی ہے کہ سنت ابراہیمی پر عمل کرتے ہوئے خلوص نیت سے صرف اور صرف رب کی رضا کے لیے قربانی کی جائے اور اس میں دکھاوے کا عنصر بالکل بھی نہ ہو , پھر چاہے وہ انتہائی کم قیمت جانور ہی کیوں نہ ہو, وہ دربار خداوندی میں قابل قبول ہوگی کیوں کہ سب اللہ کی پیدا کردہ مخلوق ہیں اور اس کے لیے کوئی بد تر یا برتر , خوبصورت یا بد صورت جانور نہیں ہے.

قرآن مجید کے سورۃ حج میں اللہ تعالیٰ فرماتے ہیں:
’’ہر امت کے لیے ہم نے قربانی کا ایک قاعدہ مقرر کردیا ہے تاکہ لوگ ان جانوروں پر اللہ کا نام لیں جو اس نے ان کو بخشے ہیں۔

(جاری ہے)

پس تمہارا خدا ایک ہی خدا ہے اور اسی کے تم مطیع فرمان بنو۔‘‘ الحج:34
یعنی اصل مقصد زمان اور مکان نہیں بلکہ خلوص نیت سے قربانی ہے. اللہ تعالی کے نزدیک  حضرت ابراہیم اور حضرت اسماعیل علیہ سلام کی قربانی کو تا قیامت امر کردیا گیا ہے اور اسے اسلامی عبادات کا ایک لازمی جز بنادیا گیا ہے.

اس دن کی مناسبت سے حج کے موقع پر  نہ صرف مکہ مکرمہ میں بلکہ پوری امت مسلمہ کو اس بات کا پابند بنا دیا گیا  ہے کہ وہ بھی شریک عبادت رہیں اور ثواب دارین سے محروم نہ رہیں . اس دن کو عالم اسلام میں عید قربان منائی جاتی ہے یعنی یہ مسلمانوں کے لیے خوشی کا دن ہے کہ اس دن اللہ کی رضا سے  پیغمبر والد کے ہاتھوں ایک پیغمبر بیٹا ذبحہ ہونے سے بچ گیا.
سورۃ حج میں ہی ایک اور جگہ اللہ تعالی فرماتے ہیں .
ترجمہ
’’اور  اونٹوں کو ہم نے تمہارے لیے شعائر اللہ میں شامل کیا ہے، تمہارے لیے اُن میں بھلائی ہے۔ ان جانوروں کو ہم نے اس طرح تمہارے لیے مسخر کیا ہے تاکہ تم شکریہ ادا کرو۔ نہ ان کے گوشت اللہ کو پہنچتے ہیں نہ خون، مگر اسے تمہارا تقویٰ پہنچتا ہے۔ اس نے ان کو تمہارے لیے مسخر کیا ہے تاکہ اس کی بخشی ہوئی ہدایت پر تم اس کی تکبیر کرو۔‘‘الحج:36۔37
یہاں مراد یہی پے کہ خون گرانے اور گوشت کی نیت سے نہیں بلکہ تقوی کی بنیاد پر ہی قربانی  کرنی چاہیے کیونکہ رب کائنات کو خون اور گوشت سے کوئی فائدہ نہیں پہنچے گا .

ساتھ ہی یہ اس بات کی جانب بھی اشارہ کرتی ہے کہ ہمارے پاس جو کچھ بھی ہے وہ اللہ کا ہی ہے اور ہم اللہ کے حکم سے ہی قربانی کرتے ہیں . پھر اس جانور  کے تین حصے کرنے کا مقصد یہی ہے کہ ہمیں اپنے اردگرد غریبوں اور رشتہ داروں کا بھی خیال رکھنا چاہیے ,جن کی مالی حیثیت اتنی نہیں ہے کہ وہ قربانی کرسکیں یا پھر پورا سال گوشت تو الگ باقی کھانوں سے بھی  محروم رہتے ہیں.

قربانی کے نتیجے میں جہاں ایک طرف غریب کے گھر میں بھی چولہا جلتا ہے تو دوسری طرف آپس میں محبت اور یگانگت کا درس بھی ملتا ہے . یعنی ہمیں حج , قربانی اور عید کے اس تہوار سے حقوق اللہ اور اور حقوق العباد کی ادائیگی کا ایک ساتھ موقع ملتا ہے.
اس قربانی کا ایک اور اہم مقصد اللہ تعالی کی بڑائی کو ماننا اور ہمیشہ اس کے ہر حکم کی پاسداری کرکے سر تسلیم خم کرنا بھی ہے.

اورجان نثاری  تابعداری کرنا اور حق بندگی ادا کرنے میں بالکل بھی نہیں جھجکنا شامل ہے . ساتھ ہی اس کی عطا کردہ نعمتوں کا دل سے شکر گزار ہونا بھی ان شعائر میں شامل ہے. اس لیے ہمیشہ قربانی کرتے وقت اس کے بنیادی مقاصد اور اغراض کو ذہن میں رکھنا  چاہیے  اور حق بندگی پورے جوش ,ولولے اور ثواب کی نیت سے ہی ادا کرنا چاہیے نہ کہ دکھاوے کی غرض سے۔