الجھے ذہن

آج کل ہم سب کو کہیں نا کہیں سے ایک لفظ "ڈپریشن" ضرورسننے کو ملتا ہے۔ ہر دوسرا شخص یہ کہتا نظر آتا ہے میں بہت ڈپریسڈ ہوں ۔۔۔۔ تو آخر یہ ڈپریشن ہے کیا؟
ڈپریشن ایک مخصوص کیفیت کا نام ہے جس میں انسان خود کو تنہا محسوس کرتا ہے۔ انسان کے اندر ایک خوف اور شک آ جاتا ہے جس سے وہ خود کو ایک ناکام شخص تصور کرتا ہے۔  اورآج کی نوجوان نسل میں اِس مرض کی شرح تیزی سے پھیل رہی ہے۔

 نفسا نفسی کے دور میں جوہم اپنی خواہشوں کو پورا کرنے کی خاطر ایک دوسرے سے آگے نکلنے کے جنون میں اندھے ہو چلے ہیں اچھائی اور برائی میں فرق تک بھول گئے ہیں۔ اسٹیٹس کی دوڑ میں جائز وناجائز طریقے سے زیادہ سے زیادہ کما کر اور پرتعیش لائف سٹائل کو اختیار کرنے کے جنون میں ہم بس بھاگ رہے ہیں۔

(جاری ہے)

جس کے باعث ہم نا صرف سماجی نظام میں زوال کا شکار ہیں بلکہ اِس وجہ سے خونی رشتوں میں بھی خودغرضی اور مفاد پرستی بڑھتی جا رہی ہے۔

بہت سے نوجوان تو اِس وجہ سے بھی ڈپریشن میں مبتلا ہیں کہ اُنہیں بے عزتی کا خوف ہے۔ آج کے نوجوان کو تواِس بات کا خوف بھی ہے کہ لوگ اُسے بھول نہ جائیں۔۔۔ امتحان میں ناکام ہو گیا تو لوگ کیا کہیں گے۔۔۔ وہ زندگی میں کچھ کر نہ سکے تو لوگ کیا کہیں گے۔۔۔ وقت سے شادی نہ ہوئی تو لوگ کیا کہیں گے۔۔۔ وقت پہ نوکری نہ ملی تو لوگ کیا کہیں گے۔۔۔۔ وغیرہ وغیرہ
کیا ہم زندگی میں لوگوں کو دکھانے کے  لیے کچھ کرنا چایتے ہیں۔

کیا ہم بس لوگوں کے لیے جی رہے ہیں۔ اللہ والے کو کیسے ڈپریشن ہو سکتا ہے۔ کیا اِس بات سے یقین اٹھ گیا ہے ہر محنت کرنے والے کو اللہ اُس کا صلہ ضرور دیتا ہے۔ کسی کی چھوٹی سی محنت وہ رائیگاں نہیں جانے دیتا۔ لیکن شرط یہی ہے کہ تم محنت کرو۔ تم کیوں گھبرا گئے ہو۔ یہ مایوسی تم میں کیوں ہے۔ کیا تمہیں خود پر اتنا یقین نہیں۔ یہ لوگ تمہیں کچھ کہہ بھی دیں تو کیا ہو جائے گا؟ تم جیت جاؤ یا ہارجاؤ یہ لوگ کچھ نا کچھ تو کہیں گے ہی۔

تمہیں جو کرنا ہے تو خود کے لئے کرولیکن کرو اور رستہ صحیح چنو۔ خود کے ضمیر کو مطمئن کرو۔ تمہیں لوگوں کو بول کر قائل نہیں کرنا۔ خود کو منوانا ہے تو کچھ کر کے دکھاو۔ یہ کیسی الجھنوں کو ذہنوں میں پال رکھا ہے جس نے تمہیں اپنوں تک سے دور کر دیا ہے اور کیا بلاوجہ ہر چیز کو سوچ کرپھراُس سے تنگ آ کر خود کو عجیب اذیت میں ڈالنا اور ڈپریشن جیسے مرض میں مبتلا ہو جانا۔ یاد رکھیں زندگی میں آگے بڑھنا ہو تو ہر غلط کو کان نہیں دینے ہوتے۔ محنت کے ساتھ خود پر اور اللہ پریقین رکھنا ہوتا ہے۔