سوشل بینک بنانا باصلاحیت لوگوں کی نشانی‎

 دوسروں کے ساتھ اچھے تعلقات بناکر رکھنے کی صلاحیت ایک ایسی صلاحیت ہے جو اعلیٰ انسانی خوبی قرار دی جاسکتی ہے۔وہ لوگ جو سماج میں اعلیٰ ربتوں پر فائز ہوتے ہیں ان میں صلاحیت ہوتی ہے کہ وہ لوگوں سے اچھے تعلقات بناکر رکھتے ہیں اور وہ ایسا صرف اپنے عہدوں کی بنیاد پر نہیں کرتے بلکہ ان کی کامیابی اور سماجی مرتبے کی وجہ ہی بنیادی طور پر یہی ہوتی ہے کہ وہ ہر قسم کے لوگوں سے بآسانی میل جول بڑھاسکتے ہیں۔

گھر یلو اور دفتری تعلقات کے علاوہ انسان کو بہت سے دیگر تعلقات بھی نبھاناپڑتے ہیں۔ دوستوں اور شناساؤں کے علاوہ کتنے ہی ایسے لوگ ہوتے ہیں جن سے روز آپ کا واسطہ پڑتا ہے۔ مثال کے طور پر لفٹ مین،مالی،گھریلو ملازم،دوکانداروں اور یہاں تک کے وہ گوالہ جو آپ کو دودھ دینے آتا ہے۔

(جاری ہے)

وہ ڈاکیا جو آپ کے خط گھر چھوڑنے آتا ہے اور وہ دھوبی جو آپ کے کپڑے دھو کر گھر دے جاتا ہے اس سے بھی ملنا پڑتا ہے۔

یہ تعلقات گہرے نہیں ہوتے مگر بہرحال یہ سب تعلق ہماری زندگی سے نکل جائیں تو کئی قسم کے مشکلات سے ہمارا پالا پڑسکتا ہے۔
کامیابی کا سُپر سٹر کچر اچھے تعلقات کی بنیاد پر تعمیر ہوتا ہے۔اور اچھے تعلقات اچھے اخلاق اور رویے کی بنیاد پر استوار ہوتے ہیں۔خوش قسمت وہ ہوتا ہے جو اپنے اخلاق اور بہترین رویے سے دوسروں کو متا ثر کرے۔ ایسے انسان کے لئے مزید سے مزید راہیں کھلتی رہتی ہیں۔

لیکن اسکے ساتھ ساتھ کچھ انسان ایسے بھی ہوتے ہیں جو اپنے ناپسندیدہ عادات وبرتاؤ کی وجہ سے خود کو دوسروں سے دور کردیتے ہیں اور انہی کی وجہ سے ان کا سوشل بینک نہیں بن پاتا۔ بہت سے لوگوں کو دوسروں کی خامیاں ڈھونڈنے کی عادت ہوتی ہے۔وہ ہر وقت گلے شکوے کرتے رہتے ہیں اور منفی پن کا رویہ اپناتے ہیں۔وہ خود غرض ہوکر صرف اپنا کام نکلواتا ہے اور دوسرئے لوگوں کے کام آنے سے کترآتاہے۔

وہ ہر وقت ”میں اور میرا فائدہ“والی سوچ رکھتا ہے اور دوسروں کے فائدے کے لیئے نہیں سوچتا۔
لوگوں کو اپنے ساتھ جوڑنے کے لیے انسان کا دل بڑا اور اخلاق اچھے ہونے چاہئیں اوراس کے ساتھ ساتھ دوسروں کا خیال بھی رکھنا چاہئیے۔ہم لوگوں میں چونکہ شائستگی کی کمی ہوتی ہے اس وجہ سے اپنے ساتھ جڑے قیمتی لوگوں کو ضائع کردیتے ہیں۔انسان اگر زندگی کے بس سے لوگوں کو اُتارتا جائے تو آخر میں صرف وہ ہی اکیلا رہ جائے گا۔

حالانکہ زندگی کا حُسن تویہ ہے کہ آپ اپنے تعلقات کی بس کو بھر کررکھیں۔ سوشل بینک رکھنے والا انسان ہی بہترین ٹیم بناسکتاہے۔
انسان کا سوشل بینک اس وقت بنتا ہے جب وہ اپنے سے جڑے لوگوں کا خیال رکھیں کیونکہ جو انسان اپنا ایک ادنیٰ ملازم ٹھیک طرح نہیں رکھ سکتا وہ ایک پوری ٹیم کیسے بنائے گا اور چلائے گا۔اگر وہ دوسروں کو تنگ کرتا رہے تو اس کے پاس لوگ نہیں رُکیں گے اور وہ آہستہ آہستہ تنہائی کا شکار ہوتا جائے گا۔خوش گوار تعلقات کے لیے یہ بھی ضروری ہے کہ ہمیشہ  ”Happy Ending“ یعنی خوش گوار خاتمہ کریں۔کسی بھی معاملے یا مسئلے کو اچھے انداز میں ختم کریں اور اگر کسی رشتے کے ساتھ نباہ کرنا مشکل ہوتو پھر اس کو بالکل چھوڑنے کے بجائے صرف مدہم کردیں۔