قدرت کا لاک ڈاون اور کشمیر‎

گذشتہ کئی دنوں سے  خاموشی کا سا سماں ہے لوگ گھروں میں خود اسیری میں جکڑے ہیں کاروبار ماند ہیں مارکیٹں بند ہیں مساجد میں نماز پر پابندی ہے مرنے والوں کو رشتہ دار اور خاندان دیکھنے سے محروم ہیں انتہائی اہم بیماریوں کا علاج کیا جا رہا ہے ہر ایک کو گھر میں رہنے کی تلقین کی جاتی ہے نہ ماننے والو کے خلاف کاروائی کی جاتی ہے پولیس کی معاونت کے لیے فوج بھی میدان میں ہے اور یہ کوشش کی جا رہی ہے کہ کوئی لاک ڈاون کی خلاف ورزی نہ کرےحکم عدولی پر لاٹھی چارج کیا جاتا ہے! جی   یہ سب کشمیر کی خبر نہیں بلکہ پوری دنیا کی صورت حال ہے بدقسمتی سے کشمیر میں یہ سب ہوا ہے اورآج دنیا جس کی لپیٹ میں ہے۔

بنی اسرائیل دور میں ایک شخص کی وجہ سے ستر ہزار سےزائد کی امت کو اپنی رحمت سے محروم کرنے والی قدرت نے کلمہ حق کہنے والوں پہ ظلم تو دیکھا ہوگا خدا نے اس کی وحدانیت پہ یقین رکھنے والوں کی عصمت دری بھی دیکھی ہوگی جوانوں کی لاشوں کی بے حرمتی بھی تو اس کے علم میں رہی ہو گی بچوں اور بوڑھوں کی آہیں اور سسکیاں بھی تو عرش تک پہنچی ہونگی اور پھر وہ ذات اپنی قدرت دکھانے پر مجبور ہوئی ہوگی۔

(جاری ہے)

ایک چھوٹے سے وائرس نے بڑی سوپر پاورز، بڑے ممالک، بڑی معشیت،(جو کشمیر پر بے حسی کی تصویر تھے) کو آج اپنی کنیز بنا رکھا ہے۔ اس وباء کی کوئی دوا ہے نہ ہی ویکسین چنانچہ اس بیماری کو روکنا اس کا علاج ہے اور روکنے کے لیے ضروری ہے لاک ڈاون وہی لاک ڈاون جو پچھلے کئی مہینوں سے کشمیر پر مسلط رہا اور قدرت کو پوری دنیا میں اسی طرح کا لاک ڈاون چایئے جس طرح کشمیر میں رہا آج پوری دنیا اور ہر مکتبہ فکر کے لوگ چیخ چیخ کر لاک ڈاون پر عمل پیرا ہونے کی درخوست کر رہے ہیں یہ وہی دنیا ہے جس نے کشمیریوں پر ظلم دیکھ کر خاموشی اختیار کی کئی ایک نے اپنے کاروبار کو ترجیع دی اور بااختیار اداروں نے مصلحت کو بہتر جانا، ہم مسلمانوں نے بھی بیانات کی حد تک کشمیریوں کا ساتھ دیا۔

عید ہو یا اور مذہبی تہوارہم کشمیروں کو بھول ہی گئے تھے آج صرف کشمیر ہی نہیں ہر جگہ پر مسجدیں ویراں ہو گئی ہیں شائد قدرت اہل ایمان پر بھی بہت ناراض ہوئی کہ حرمین شریفین کو بند کرنا پڑا۔ اب شاید ہماری عیدیں بھی کشمیریوں کی طرح ہونگی ہمارے جنازے بھی اسی طرح اٹھیں گے اور ہماری نمازیں بھی اسی طرح ہونگی۔مشرق تا مغرب ایک ہی ماحول ہے یقینا اس وباء کو دیکھنے کے اور بھی پہلو ہیں مگر کشمیر ان سب میں قریب تر ہوگا۔ یہ قدرت کا لاک ڈاون ہےاور صرف انسانوں کے لیے ہے۔ بے شک وہ سب سے بہتر چال چلنے والا ہے۔