( ن) لیگ در حقیقت نالائق،نکھٹی اور نکمی لیگ ہے ، ہماری مقبولیت سے خائف شہباز شریف حبیب جالب کی غمگین غزلیں گا کر اپنا دُکھ کم کرتے ہیں ، جنگلا بس منصوبے پر 70 ارب روپے ضائع کرکے پنجاب کوکنگال کردیاگیا،آنے والے انتخابات میں نواز شریف اور شہباز شریف کو ایسا سبق ملے گاکہ ساری زندگی سیاست کا نام نہیں لیں گے،ہمارا مشن جھوٹے مقدمات درج کروانا یا کسی سے انتقام لینا نہیں نیک نیتی سے عوام کی خدمت کرنا ہے،آئندہ انتخابات میں کامیابی ہمارا اور ناکامی نواز لیگ کا نصیب ہو گی ،مسلم لیگ (ق)کے مرکزی رہنماء ونائب وزیر اعظم چودھری پرویز الٰہی کاجلسہ عام سے خطاب

حافظ آباد(اُردو پوائنٹ اخبار تازہ ترین۔آئی این پی۔1مارچ۔2013ء) مسلم لیگ (ق)کے مرکزی رہنماء ونائب وزیر اعظم چودھری پرویز الٰہی نے کہا ہے کہ شہباز شریف نے جنگلا بس منصوبے پر 70 ارب روپے ضائع کرکے پنجاب کوکنگال بنا دیا،صوبہ بھر کی عوام ایسے غلط منصوبوں کی وجہ سے شہباز شریف کو رو رہی ہے،آنے والے انتخابات میں نواز شریف اور شہباز شریف کو ایسا سبق ملے گاکہ وہ ساری زندگی سیاست کا نام نہیں لیں گے،ہمارا مشن جھوٹے مقدمات درج کروانا یا کسی سے انتقام لینا نہیں بلکہ نیک نیتی سے عوام کی خدمت کرنا ہے،آئندہ انتخابات میں کامیابی ہمارا اور ناکامی نواز لیگ کا نصیب ہو گی۔

وہ جمعہ کویہاں ایک بڑے جلسہ عام سے خطاب کررہے تھے ۔ چودھری پرویز الٰہی نے کہا کہ شہباز شریف ہماری مقبولیت سے جب خائف ہوتا ہے تو وہ حبیب جالب کی غمگین غزلیں گا کر اپنا دُکھ کم کرنے کی کوشش کرتا ہے۔

(جاری ہے)

پنجاب حکومت کو عوام کے دکھوں اور تکلیفوں کا کوئی خیال نہیں اُن کا شیوہ صرف اپنی خوشامد کرنا ہے ، ہم نے اپنے دور اقتدار میں ساڑھے نو سو سکولوں کو اپ گریڈ کیا اور دو سو نئے سکول تعمیر کیے لیکن تعلیم دشمن شہباز شریف نے پنجاب بھر میں چار ہزار سکول بند کر دیئے۔

دانش سکولوں کے منصوبہ پر کروڑوں روپے ضائع کیے،اور ان سکولوں کی صورتحال یہ ہے کہ وہاں گائیں بھینسیں بندھی ہوئی ہیں۔میں تو کہتا ہوں کی شہباز شریف آؤ ہمارا مقابلہ کرو ،دور دور تک تم ہمارا مقابلہ نہیں کر سکتے۔ہم نے غریب عوام کو میٹرک تک مفت تعلیم،کتابیں اور مفت ادویات دیں،دُنیا بھر سے ڈاکٹر پاکستان آئے لیکن شہباز شریف نے ان ڈاکٹروں کو ہڑتالوں پر مجبور کر دیا اور ان پر لاٹھیاں برسائی گئیں۔

آج غریب عوام مفت دوائی کیلئے دربدر کی ٹھوکریں کھانے پر مجبور ہے۔انہوں نے کہا کہ ہم اپنے دور میں ایک سو ارب روپیہ خزانے میں چھوڑ کر گئے لیکن شہباز شریف کی غلط پالیسیوں کی وجہ سے پنجاب پانچ سو ارب روپے کے خسارہ میں ہے۔اُنہوں نے کہا کہ( ن) لیگ در حقیقت نالائق،نکھٹی اور نکمی لیگ ہے ۔غربت بے روزگاری کے باعث پنجاب میں 6ہزار نوجوانوں نے خود کشیاں کیں ۔

ہم نے لاکھوں بے روزگار نوجوانوں کو نوکریاں دیں ،لوگوں کی مدد کیلئے ریسکیو1122سروس شروع کی جس کی وجہ سے آج لاکھوں عوام کو ریلیف مل رہا ہے۔عوام آئندہ انتخابات میں ہمیں کامیاب کرکے ن لیگ کا ہمیشہ ہمیشہ کیلئے صفایا کر دے گی۔جلسہ سے وفاقی وزیر برائے ورکس چودھری لیاقت عباس بھٹی، چودھری مونس الٰہی، سابق رکن قومی اسمبلی چودھری مہدی حسن بھٹی، متحدہ جمعیت اہل حدیث کے سربراہ علامہ سید ضیاء اللہ شاہ بخاری،سابق صوبائی وزیر چودھری شوکت علی بھٹی، سابق تحصیل ناظم رائے جہانگیر علی کھرل نے بھی خطاب کیا جبکہ سعودی شہزادہ صالح محمد، وفاقی وزیر برائے بین المذاہب اکرم مسیح گل،مسلم لیگ پنجاب کے جنرل سیکرٹری چودھری ظہیر الدین،مسلم لیگ یوتھ ونگ پاکستان کے صدر زاہد اقبال چودھری، سابق ضلع ناظم چودھری مبشر عباس بھٹی،رائے ریاست علی کھرل، رائے سکندر نواز بھٹی مقامی عہدیداروں سمیت کارکنوں کی بڑی تعداد نے شرکت کی۔