مسئلہ کشمیر پر آزاد کشمیر کی ساری سیاسی قیادت ایک نقطے پر متحد ومتفق ہے‘بھارتی وزیر اعظم کی برطانیہ آمد پر آزادکشمیر کی ساری سیاسی قیادت متحد ہو کر لندن میں احتجاج کر رہی ہے‘( آج) لندن میں آزا د کشمیر کی ساری سیاسی قیادت متحد ہو کر بھارتی وزیر اعظم کے خلاف احتجاجی مظاہرہ کرے گی

ڈسٹرکٹ کوآڈنیٹر ٹووزیراعظم طاہر فاروق رئیسانی کی بات چیت

بدھ 18 اپریل 2018 17:21

ہٹیاں بالا(اُردو پوائنٹ اخبارتازہ ترین - آئی این پی۔ 18 اپریل2018ء) ڈسٹرکٹ کوآڈنیٹر ٹووزیراعظم طاہر فاروق رئیسانی نے کہا کہ مسئلہ کشمیر پر آزاد کشمیر کی ساری سیاسی قیادت ایک نقطے پر متحد ومتفق ہے۔بھارتی وزیر اعظم کی برطانیہ آمد پر آزادکشمیر کی ساری سیاسی قیادت متحد ہو کر لندن میں احتجاج کر رہی ہے۔ آج لندن میں آزا د کشمیر کی ساری سیاسی قیادت متحد ہو کر بھارتی وزیر اعظم کے خلاف احتجاجی مظاہرہ کرے گی اس مظاہرے میں سکھ، دلت،عیسائی کمیونٹی بھی شرکت کرے گی۔

وزیر اعظم آزاد کشمیر راجہ محمد فاروق حیدر خان۔ اپوزیشن لیڈر چوہدری محمد یاسین،جماعت اسلامی کے سابق امیر عبدالرشید ترابی، آزاد کشمیر کا پارلیمانی وفد،اوورسیئر کشمیری آج متحد و منظم ہو کر بھارتی وزیر اعظم کے خلاف احتجاجی مظاہرہ کریں گے۔

(جاری ہے)

میڈیا سے گفتگو کے دوران ان کا کہنا تھا کہ پاکستان مسلم لیگ ن آزاد کشمیر کی حکومت نے تحریک آزادی کشمیر کو اولین ترجیحات میں شامل کر رکھا ہے۔

تحریک آزادی کشمیر کو قومی اور بین الاقوامی سطح پر اجاگر کرنے کے لیے فاروق حیدر حکومت نے جاندار اقدامات اٹھائے ہیں۔ بھارت کی طرف سے شوپیاں میں حالیہ دھشت گردی کے خلاف پاکستان و آزاد کشمیر کی ساری سیاسی قیادت نے متحد ہو کر آواز بلند کی ہے۔ وزیر اعظم پاکستان شاہد خاقان عباسی نے آزاد کشمیر قانون ساز اسمبلی اور آزادجموں و کشمیر کونسل کے مشترکہ اجلاس سے خطاب کیا اور کشمیر کی جدوجہد آزادی کی مکمل حمایت کا اعلان کر کے اس پر مثبت پیغام دیا۔

ان کا کہنا تھا کہ لندن مظاہرے کا مقصد عالمی برادری کو بھارت کے اصل چہرے سے آگاہ کرنا ہے۔ بھارت مقبوضہ کشمیر میں انسانی حقوق کی سنگین پامالیوں کا مرتکب ہو رہا ہے بھارتی فوج جنگی جرائم، میں ملوث ہے جس کی اقوام متحدہ کی سطح پر تحقیقات ناگزیر ہیں۔ بھارت نے کشمیر میں اپنے جنگی جرائم کو چھپانے کے لیے وادی کو سیل کر کے انسانی جیل میں تبدیل کر رکھا ہے۔ کشمیر میں بھارت جس انداز میں مظالم ڈھا رہا ہے دنیا میں اس کی مثال نہیں ملتی۔ لندن میں بھارت مخالف احتجاج سے کشمیریوں کی آواز پوری دنیا میں جائیگی۔ دولت مشترکہ کے اجلاس کے موقع پر بھارت کے خلاف احتجاج سے عالمی برادری کو کشمیر میں بھارت کے مظالم سے آگاہی ملے گی۔