Live Updates

عمران خان نے ووٹ بیچنے کا الزام لگاکر سیاسی ساکھ کو نقصان پہنچایا،معراج ہمایون

سینیٹ الیکشن کے بعد ہی میں پی ٹی آئی میں شامل ہوئی ہوں، اگر کوئی پوچھ سکتا تھا تو وہ قومی وطن پارٹی تھی

جمعرات 19 اپریل 2018 23:04

پشاور۔ (اُردو پوائنٹ اخبارتازہ ترین - اے پی پی۔ 19 اپریل2018ء) تحریک انصاف کی رکن خیبر پختونخوا اسمبلی معراج ہمایون خان نے تحریک انصاف کے چیئر مین عمران خان کی جانب سے سینیٹ الیکشن میں ووٹوں کی فروخت کے الزام پر تشویش کا اظہار کیا ہے اور وضاحت دی ہے کہ سینیٹ الیکشن کے وقت وہ قومی وطن پارٹی کا حصہ تھی۔ پشاور پریس کلب میں پریس کانفرنس کرتے ہوئے معراج ہمایون نے کہاکہ پی ٹی آئی نے کس بنیاد پر میرا نام اپنے پینل میں ڈالا،عمران خان نے مجھ پر ووٹ بیچنے کا الزام لگاکر سیاسی ساکھ کو نقصان پہنچایا، سینیٹ الیکشن کے بعد ہی میں پی ٹی آئی میں شامل ہوئی ہوںاورالیکشن کے وقت میں قومی وطن پارٹی میں تھی،مجھ سے اگر کوئی پوچھ سکتا تھا تو وہ قومی وطن پارٹی تھی۔

انہوںنے کہاکہ قومی وطن پارٹی اور پی ٹی آئی کے اتحاد کی وجہ سے میں نے سینیٹ الیکشن میں پی ٹی آئی کے امیدواروں کو ووٹ دیا،ابھی تک پی ٹی آئی کی جانب سے مجھے شوکاز نوٹس نہیں ملا،عمران خان کے الزام پر میری، میرے خاندان اور ورکرز کی دل آزاری ہوئی،سینیٹ الیکشن کے وقت میں پی ٹی آئی کی پابند نہیں تھی۔

(جاری ہے)

ان کاکہنا تھا کہ میں نے پرویز خٹک کے پینل کو ووٹ دیا جس میں انیسہ زیب طاہرخیلی بھی شامل تھی،میرے نام کیساتھ قومی وطن پارٹی لکھا ہوا ہے تو پھر کیوں میری تذلیل کی گئی ،وزیر اعلیٰ پرویز خٹک کو کیسے پتہ چلا کہ میں نے ووٹ کس کو دیا،شوکاز نوٹس کا انتظار کروں گی اور اپنا دفاع کروں گی اور پارٹی لیڈر شپ کو مطمئن کرنے کی کوشش کروں گی،عمران خان کے فیصلے کا احترام کروں گی چاہے جو بھی فیصلہ ہو۔