وزیراعلیٰ پنجاب کی زیرصدارت اجلاس،

رمضان المبارک میں سستے آٹے کی فراہمی پر 11 ارب روپے کی سبسڈی کی منظوری رمضان بازاروں اوراوپن مارکیٹ میں 20 کلوگرام آٹے کا تھیلا 500 روپے،10 کلو گرام آٹے کا تھیلا 250 روپے میں ملے گا صوبہ بھر میں 300 سے زائد سستے رمضان بازار لگائے جائینگے، 32 ماڈل بازار بھی سستے رمضان بازاروں کے طور پر کام کرینگے زرعی فیئر پرائس شاپس بھی قائم کی جائینگی،سستے رمضان بازاروں میں دالیں، گھی، چینی، پھل اور سبزیاں سستے داموں دستیاب ہونگی عام آدمی کو ریلیف کی فراہمی میرا مشن ہے،اس مقصد کیلئے ہر ضروری قدم اٹھایا جائی:شہبازشریف

جمعہ 20 اپریل 2018 22:57

لاہور (اُردو پوائنٹ اخبارتازہ ترین۔ 20 اپریل2018ء) وزیراعلیٰ پنجاب محمد شہبازشریف کی زیر صدارت اعلیٰ سطح کا اجلاس منعقد ہوا جس میں رمضان المبارک کے دوران صوبہ پنجاب کے عوام کو ریلیف دینے کیلئے رمضان پیکیج 2018ء کی منظوری دی گئی۔ اجلاس میں رمضان المبارک کی آمد کے پیش نظر اشیائے ضروریہ کی دستیابی اور قیمتوں کا جائزہ لیا گیا۔ وزیراعلیٰ محمد شہبازشریف نے اجلاس سے خطاب کرتے ہوئے کہا کہ عوام کو ماہ مقدس میں سستے آٹے کی فراہمی پر 11 ارب روپے کی خطیر سبسڈی دی جائے گی۔

رمضان بازاروں اوراوپن مارکیٹ میں 20 کلوگرام آٹے کا تھیلا 500 روپے جبکہ 10 کلو گرام آٹے کا تھیلا 250 روپے میں دستیاب ہو گا۔ رمضان المبارک کے دوران عوام کو ریلیف دینے کیلئے صوبہ بھر میں 300 سے زائد سستے رمضان بازار لگائے جائیں گے جبکہ 32 ماڈل بازار بھی سستے رمضان بازاروں کے طور پر کام کریں گے۔

(جاری ہے)

فری سحر و افطارکیلئے صوبہ بھر میں 2 ہزار دسترخوان لگائے جائیں گے۔

وزیراعلیٰ نے کہا کہ سستے رمضان بازاروں میں دالیں، گھی، چینی، پھل اور سبزیاں سستے داموں دستیاب ہوں گی۔ سستے رمضان بازاروں میں زرعی فیئرپرائس شاپس بھی قائم کی جائیں گی اور ان زرعی فیئر پرائس شاپس پر دالیں اور سبزیاں مارکیٹ سے ارزاں نرخوں پر دستیاب ہوں گی۔ وزیراعلیٰ نے ہدایت کی کہ گزشتہ برس کی طرح اس سال بھی رمضان المبارک کے دوران عوام کو اشیائے خورد و نوش سستے داموں کی فراہمی کو یقینی بنانے کیلئے موثر اقدامات کئے جائیں۔

رمضان بازاروں میںسکیورٹی کے بہترین انتظامات ہونے چاہئیں۔ اشیائے ضروریہ کی وافر مقدار میں دستیابی یقینی بنائی جائے اور کسی چیز کی قلت کی شکایت پیدا نہیں ہونی چاہیئے۔ وزیراعلیٰ نے کہا کہ عام آدمی کو ریلیف کی فراہمی میرا مشن ہے،اس مقصد کیلئے ہر ضروری قدم اٹھایا جائے۔ رمضان بازاروں اور عام مارکیٹوں میں اشیائے ضروریہ، پھلوں، سبزیوں اور دالوں کی قیمتیں نمایاں طور پر آویزاں ہونی چاہئیںاور عوام کی سہولت کیلئے ڈیجیٹل پرائس بورڈ لگائے جائیں۔

انہوں نے کہا کہ گرمی کے پیش نظر رمضان بازاروں میں خرایداروں کی سہولت کیلئے بہترین انتظامات کئے جائیں اور پارکنگ کا مناسب انتظام ہونا چاہیئے۔ اجلاس کو رمضان بازاروں کے انتظامات کے حوالے سے بریفنگ دی گئی۔ اجلاس کو بتایا گیا کہ رمضان المبارک کی آمد سے قبل اشیائے خورد ونوش کی قیمتوں میں استحکام اور کمی کا رجحان دیکھنے میں آیا ہے۔صوبائی وزراء رانا ثناء اللہ ، شیخ علاؤالدین ، ڈاکٹر عائشہ غوث پاشا، چیف سیکرٹری ، متعلقہ سیکرٹریز اور اعلیٰ حکام نے اجلاس میں شرکت کی۔ صوبائی وزیر زراعت نعیم اختر بھابھہ پنجاب ہاؤس اسلام آباد جبکہ سیکرٹری زراعت لیہ سے ویڈیو لنک کے ذریعے اجلاس میں شریک ہو ئے۔