لوگ مررہے ہیںلیکن حکمرانوںکی توجہ نگراں سیٹ اپ پرہے، سحروافطارکے دوران بجلی کی لوڈ شیڈنگ زیادتی ہے، ارشدمرزا

کراچی (اُردو پوائنٹ اخبارتازہ ترین - آئی این پی۔ 22 مئی2018ء) پاکستان ڈیموکریٹک پارٹی کے مرکزی رہنماارشدمرزانے کہاہے کہ رمضان شریف میں بھی عوام کو سکون کا سانس نہیں مل رہا،سحروافطارکے دوران بجلی کی لوڈ شیڈنگ انتہائی ظلم اور زیادتی کے مترادف ہے، حکومتی اداروںنے جان بوجھ کر عوام کو مسائل کی دلدل میں دھکیل دیاہے، ایک جانب ہیٹ ویواور ہیٹ اسٹروک ہے تودوسری جانب کے الیکٹرک نے عوام کو پریشان کرنے کا ٹھیکہ لے رکھاہے، زیادہ تراموات بجلی نہ ہونے کی وجہ سے ہوئی ہیں، لیکن حکمرانوں کی تمام ترتوجہ نگراں حکومت یاپھر آئندہ حکومت پر لگی ہوئی ہے،لوگ مررہے ہیں لیکن کوئی پرسان حال نہیں ہے،افسوس حکمراں عوام کو ریلیف نہیں بلکہ تکلیف دے رہے ہیں،عوام کو اس مرحلے پر ریلیف نہیں دیاگیا تو آئندہ الیکشن میںیہ سیاسی لیڈران کس منہ سے ان کے پاس جائیں گے۔

(جاری ہے)

یہ باتیں انہوں نے لانڈھی کورنگی کے مختلف علاقوں میں ہیٹ ویوکے باعث ہلاک ہونے والے افرادکے اہل خانہ سے تعزیت اور دکھ کا اظہارکرتے ہوئے کہیں۔انہوں نے کہاکہ موسم کی شدت کے بارے میں حکومتی اداروں کو معلوم ہونے کے باوجود کسی قسم کے حفاظتی اقدامات نہیں کئے گئے بلکہ عوام کو حالات کے رحم وکرم پر چھوڑدیاگیا۔یہاں تک کہ بجلی فراہم کرنے والاادارہ عدلیہ کے احکامات کی دھجیاں اڑارہاہے لیکن مجال ہے کوئی کے الیکٹرک مالکان سے بازپرس کرے۔

انہوں نے کہاکہ ماہ رمضان المبارک سے قبل کے الیکٹرک نے بجلی کی مکمل فراہمی کا وعدہ کیاتھاجو اس کے پچھلے وعدوں کی طرح جھوٹاہی ثابت ہوا،دوسری جانب سحراور افطار میں گیس کی بھی لوڈشیڈنگ شروع کردی گئی ہے،بعض مقامات پر گیس پریشرانتہائی کم ہوتاہے جبکہ بعض علاقوں میں تو گیس باالکل ہی بند کردی جاتی ہے جس سے روزہ دارانتہائی پریشان ہیں۔

ان کا کہناتھاکہ کراچی کے بیشترعلاقوں میںعوام کو پانی کی بھی قلت کا سامناہے ،لوگ پانی کی بوند بوند کو ترس گئے ہیں اور مجبوری میں ٹینکروں کامضرصحت پانی پی رہے ہیں۔انہوں نے مطالبہ کیاکہ حکومتی ادارے عوام کو فوری طورپر ریلیف فراہم کریں،گیس ،بجلی اور پانی کی فراہمی کو یقینی بنایاجائے اور ہیٹ ویوسے بچائو کے لئے حفاظتی مہم شروع کی جائے۔