بہاول پور ، جماعت اسلامی پنجاب کے رہنماء ڈاکٹر سید وسیم اخترکا ہارون بلور کی شہادت پر دکھ، صدمہ اور شدید احتجاج

جمعرات 12 جولائی 2018 22:28

بہاول پور (اُردو پوائنٹ اخبارتازہ ترین - آن لائن۔ 12 جولائی2018ء) جماعت اسلامی پنجاب کے نائب امیر اور متحدہ مجلس عمل کے امیدوار این اے 170 ڈاکٹر سید وسیم اخترنے پشاور میں ہارون بلور اور چودہ سیاسی کارکنوں کی شہادتوں پر دکھ، صدمہ اور شدید احتجاج کیا ہے۔ انہوں نے کہاکہ بلور خاندان کی قربانیاں سیاسی تاریخ کا حصہ ہیں۔ انتخابی مہم میں تشدد، دہشتگردی اور باہم شدت جذبات کا بڑھتا رجحان خطرناک ہے۔

سیکورٹی ادارے اور الیکشن کمیشن ضابطہ اخلاق اور سیاسی اخلاقیات کی خلاف ورزی پر سخت ترین اقدامات کرے۔ جمہوری اور سیاسی عمل کو ذاتیات اور سیاسی دشمنیوں کا شاخسانہ نہ بنایا جائے۔وہ جج والی پل اور جموں والا کھوہ میں کارنر میٹنگز سے خطاب کر رہے تھے انہوں نے کہا کہ سیاسی انتشار، کرپٹ سیاسی دھڑوں، نااہل اور کرپٹ ناکارہ سیاسی مافیا سے نجات کا وقت آگیاہے۔

(جاری ہے)

انہوں نے کہاکہ عوام دینی جماعتوں کے اتحاد متحدہ مجلس عمل کا ساتھ دیں، انشائاللہ ملک و ملت بحرانوں سے نکل آئیں گے۔ عوام کے مسائل کا حل نظام مصطفی اور اسلام کے دائمی احکامات میں ہی ہے۔ انہوںنے کہاکہ متحدہ مجلس عمل نظام مصطفیٰ کا قیام، آئین اور قانون کی بالادستی، خواتین، نوجوانوں اور اقلیتوں کے لیے باعزت روزگار نظام دے گی۔ قومی وسائل کی منصفانہ تقسیم، پانی کی قلت اور سستی بجلی کی فراہمی کے لیے ڈیم تعمیر کریں گے۔ محب وطن عوام کے ہر طبقہ پر اعتماد کر کے ملک میں خود انحصاری لائیں گے۔ قرضوں اور سود کی لعنت سے نجات دلائیں گے۔اس موقع پر داد پوترا برداری اور جج والی پل کے بااثر افراد نے ڈاکٹر سید وسیم اختر کی مکمل حمایت کا اعلان کیا