مقبوضہ کشمیر کی صورتحال پر مستعفی ہونے والے آئی اے ایس آفیسر کے خلاف چارج شیٹ داخل

بدھ 6 نومبر 2019 21:32

نئی دہلی ۔ (اُردو پوائنٹ اخبارتازہ ترین - اے پی پی۔ 06 نومبر2019ء) انڈین ایڈمنسٹریٹو سروس کے سابق آفیسر کنن گوپی ناتھن نے کہا ہے کہ استعفیٰ دینے پر ان کے خلاف چارج شیٹ داخل کی گئی ہے۔ کشمیر میڈیا سروس کے مطابق گوپی ناتھن نے ٹویٹر پر کئی ٹویٹس کرتے ہوئے کہاکہ کاش وہ مسئلہ کشمیر پر وزیر داخلہ امت شاہ پر اثر انداز ہوسکتے۔ انہوںنے کہاکہ ان پرذرائع ابلاغ کے ساتھ بات چیت میں حکومت کی ساکھ مسخ کرنے کاالزام لگایا گیا ہے۔

(جاری ہے)

سابق آئی اے ایس آفیسر نے کہاکہ کشمیریوں کو اظہار رائے کی آزادی نہ دینے پرنوکری چھوڑنے کے دوماہ بعد ان کے خلاف چارج شیٹ داخل کی گئی ہے۔ انہوں نے بھارتی وزارت داخلہ کی طرف سے انہیں نشانہ بنانے پراس کی مذمت کی۔ گوپی ناتھن نے اپنے ٹویٹ میں نئی دہلی کی تیس ہزاری کورٹ میں پولیس اور وکلاء کے درمیان جھڑپوں پر بھارتی وزارت داخلہ کو آڑے ہاتھوں لیا۔ گوپی ناتھن نے کہاکہ وزارت داخلہ نے مجھے چارج شیٹ ای میل کی۔ مجھے معلوم ہے یہ اس سے بھی زیادہ سختی کریں گے کیونکہ جوکچھ ان کی ناک کے نیچے وکلائ اور پولیس کے درمیان ہورہا ہے یہ لوگ اس کو سنبھال نہیں سکتے۔اس لیے میں ملک کے مفاد میںان کو آزمائش کی اس گھڑی میں زیادہ پریشان نہیں کرنا چاہتا۔