ترکی کا 3 ہفتوں میں کرونا وائرس کو شکست دینے کا عزم

حکومت ملک میں کورونا وائرس کی وبا ختم کرنے کے لئے تمام تر ممکنہ اقدامات بروئے کار لا رہی ہے، احتیاطی تدابیر پر مکمل یکسوئی سے عمل کریں تو وبا پر جلد قابو پا لیں گے: ترک صدر طیب اردوان

محمد علی ہفتہ 21 مارچ 2020 00:27

انقرہ (اُردو پوائنٹ اخبارتازہ ترین۔ 20 مارچ2020ء) ترکی کا 3 ہفتوں میں کرونا وائرس کو شکست دینے کا عزم، ترک صدر طیب اردوان کا کہنا ہے کہ حکومت ملک میں کورونا وائرس کی وبا ختم کرنے کے لئے تمام تر ممکنہ اقدامات بروئے کار لا رہی ہے، احتیاطی تدابیر پر مکمل یکسوئی سے عمل کریں تو وبا پر جلد قابو پا لیں گے۔ تفصیلات کے مطابق ترکی صدر رجب طیب اردوان نے کہا ہے کہ ان کی حکومت ملک میں کورونا وائرس کی وبا ختم کرنے کے لئے تمام تر ممکنہ اقدامات بروئے کار لا رہی ہے۔

ترک صدر نے دارالحکومت انقرہ میں کورونا وائرس سے نمٹنے کے حوالے سے اجلاس کے بعد میڈیا سے گفتگو کرتے ہوئے کہا کہ اگر ہم احتیاطی تدابیر پر مکمل یکسوئی سے عمل کریں تو اس سے ہم گھروں میں قیام کی مجبوری کو تین ہفتوں تک محدود رکھ سکتے ہیں۔

(جاری ہے)

انہوں نے کہا کہ قوم کے ہر فرد سے میری گزارش ہے کہ کورونا وائرس کا خطرہ ٹلنے تک ممکنہ حد تک اپنے گھروں میں قیام کریں۔

صدر اردوان نے بتایا کہ مجھے یقین ِ کامل ہے کہ ہم دو ماہ پر محیط مزاحمت کے عرصے کو بہترین شکل میں گزار سکتے ہیں۔ انہوں نے کہا کہ ہم نے اس وبا پر قابو پانے والے تمام متعلقہ اداروں کو یکجا کرلیا ہے اور جلد ہی اس مہلک مرض کو کنٹرول کر لیں گے۔ واضح رہے کہ چین سے پھیلنے والا کروناوائرس دنیا کی180ممالک میں پھیل گیا، ہلاکتوں کی تعداد10 ہزار 50 ہو گئی، متاثرین کی تعداد دولاکھ 45 ہزار 651 ہے، اٹلی میں کرونا سے ہلاک افراد کی تعداد دنیا میں سب سے زیادہ ہوگئی جبکہ چین کرونا سے مرنے والوں کی تعداد دنیا میں دوسرے نمبر پر ہے۔

اٹلی میں کرونا سے 3 ہزار چار سو پانچ افراد ہلاک ہو گئے جبکہ اکتالیس ہزار پینتیس افراد متاثر ہیں۔چین میں کرونا سے مرنے والوں کی تعداد تین ہزار دو سواڑتالیس ہے۔ ایران میں عالمی وبا سے بارہ سو چوراسی افراد موت کے منہ میں جا چکے ہیں۔ امریکا میں کرونا سے دو سو اٹھارہ افراد ہلاک اور چودہ ہزار تین سو اکیس افراد متاثر ہیں۔ کیلی فورنیا میں لوگوں کو گھروں میں رہنے کی ہدات کر دی گئی۔

گورنر گیون نیوسم کے مطابق کیلی فورنیا کی 56 فیصد آبادی کرونا کے شکار ہونے کا خدشہ ہے۔لاس اینجلس میں شاپنگ مراکز، انڈور مالز، غیر ضروری ریٹیل تجارتی سینٹر بند کر دیئے گئے۔ ارجنٹائن لاک ڈاؤن کرنے والا جنوبی امریکا کا پہلا ملک بن گیا۔بھارت میں کرونا سے مرنے والوں کی تعداد چار ہو گئی جبکہ ایک سو چورانوے افراد متاثر ہیں۔ اقوام متحدہ کے سیکرٹری جنول انتونیو گوتریس نے عالمی رہنماؤں سے اس مشکل گھڑی میں مل کر کام کرنے کی اپیل کی ہے۔