بھارتی وزیر اعظم نریندر مودی کے دوست بزنس مین متحدہ عرب امارات کی تاریخ کا سب سے بڑا فراڈ کر کے بھارت فرار

دبئی (اُردو پوائنٹ اخبارتازہ ترین - این این آئی۔ 03 مئی2020ء) بھارتی وزیر اعظم نریندر مودی کے دوست بزنس مین باواگتھو راگھورام شیٹی (بی آر شیٹی)متحدہ عرب امارات کی تاریخ کا سب سے بڑا فراڈ کر کے بھارت فرار ہوگئے۔میڈیا رپورٹ کے مطابق بھارتی بزنس مین فروری میں بھائی کے علاج کی غرض سے ابوظبی سے بنگلور پہنچے تھے جہاں ان کے بھائی دوران علاج چل بسے تھے جس کے بعد وہ واپس امارات نہیں گئے ہیں اور اس دوران ہی ان کے فراڈ کا بھانڈہ پھوٹا۔

میڈیا کے مطابق بی آر شیٹی نے این ایم سی ہسپتال کے نام سے 80 مختلف بین الاقوامی اور اماراتی بینکوں سے تقریبا 3 ارب ڈالرکا قرضہ لیا تھا اور اب بھی ہسپتال پر 2 ارب ڈالر کے بقایا جات ہیں۔بھارتی بزنس مین نے جعلی دستاویزات، فرضی کمپنیوں، جعلی بینک اکانٹس اور دیگر دستاویزات پیش کرکے اماراتی بینکوں سے اربوں روپے کا قرضہ حاصل کیا تھا۔

(جاری ہے)

شیٹی کے فرار کے بعد اسپتال کو قرض دینے والے بینکس بھی مشکلات کا شکار ہوگئے ہیں جبکہ اسپتال کیلئے قرض چکانا بھی مشکل ہوگیا ہے۔

بی آر شیٹی نریندر مودی کے دوستوں میں سے ہیں اور یہ بھارتی حکومت کی موجودہ کشمیر پالیسی میں پیش پیش تھے۔متحدہ عرب امارات میں مفروربھارتی بزنس مین بی آرشیٹی کیخلاف قانونی کارروائی جاری ہے اور ان کے تمام بینک اکانٹس منجمد کرتے ہوئے ان کی کمپنیوں کو بلیک لسٹ کردیا گیا ہے۔اماراتی سینٹرل بینک نے حکم نامے میں بی آر شیٹی کے خاندان کے افراد کے بھی اکانٹس منجمد کرنے کا کہا ہے۔

میرے ساتھ دھوکا ہوا ہی: بی آر شیٹی کا ردعمل بھارتی بزنس مین بی آر شیٹی نے اپنے اور کمپنی پر لگے الزامات کو جھوٹ قرار دیتے ہوئے کہا ہے کہ میں نے دھوکا نہیں کیا بلکہ میرے ساتھ دھوکا ہوا ہے۔انہوں نے کہا کہ میری تحقیقات میں یہ بات سامنے آئی ہے کہ میرے نام پر کئی جعلی بینک اکانٹس، ان میں پیسوں کی منتقلی اور دیگر امور انجام دیے گئے اور ساتھ ہی میرے جعلی دستخط استعمال کیے گئے ہیں جس کا مجھے علم ہی نہیں ہے۔بھارتی وزیراعظم نریندر مودی پر اپنے کاروباری دوستوں کو فائدہ پہنچانے کے الزامات لگتے رہے ہیں۔