وزیراعظم آزادکشمیر کی عمران خان کی زیر صدارت منعقد ہونے والی نیشنل کوآرڈینیشن کمیٹی کے اجلاس میں شرکت

آزادکشمیر حکومت کے بروقت اقدامات کے باعث ابھی تک آزادکشمیر میںصورت حال قابو میں ہے،،راجہ محمد فاروق حیدر

جمعرات 7 مئی 2020 22:03

مظفرآباد(اُردو پوائنٹ اخبارتازہ ترین - این این آئی۔ 07 مئی2020ء) وزیر اعظم آزادجموں وکشمیر راجہ محمد فاروق حیدر خان نے وزیر اعظم پاکستان عمران خان کی زیر صدارت منعقد ہونے والی نیشنل کوآرڈینیشن کمیٹی کے اجلاس میں شرکت کی ۔ اس موقع پر چاروں صوبوں وزراء اعلیٰ اور وزیر اعلیٰ گلگت بلتستان حافظ حفیظ الرحمان ،وفاقی وزراء سمیت اور دیگر اعلیٰ حکام بھی موجو د تھے۔

اس موقع پر وزیراعظم آزادکشمیر خطاب کرتے ہوئے کہا کہ آزادکشمیر حکومت کے بروقت اقدامات کے باعث ابھی تک آزادکشمیر میںصورت حال قابو میں ہے۔ابھی تک آزادکشمیر میں کرونا کے 78کیسز سامنے آئے ہیں جبکہ ایکٹو کیسز صرف 20ہیں۔ آزادکشمیر میں ہفتہ میں پانچ دن کاروبار کو سخت شرائط پر کھولنے کی اجازت ہے۔

(جاری ہے)

اس کے ساتھ ساتھ دو دن مکمل لاک ڈائون ہوتا ہے۔

وزیر اعظم آزادکشمیر نے کہا کہ بیرون ملک سے آئے چھبیس ہزار افراد کو گھروں میں ٹریس کر کے قرنطینہ کیا گیا اور اب ان کی قرنطینہ کی مدت بھی پوری ہو چکی ہے۔اب باہر سے آنے والے افراد کو طے شدہ ایس او پی کو مکمل کیا ۔ہمارے تمام اداروں نے منظم حکمت عملی کے ساتھ کام کیا جس کے نتائج برآمد ہو رہے ہیں۔ وزیر اعظم آزادکشمیر نے کہا کہ حکومت پاکستان کا شکریہ ادا کرتے ہیں جنہوں نے مقبوضہ کشمیر کے اندر بھارتی مظالم کو دنیا کے سامنے بے نقاب کیا ۔

ہندوستان کرونا کی آڑمیں مقبوضہ کشمیر میں معصوم نوجوانوں کو نشانہ بنا رہا ہے جس کی جتنی مذمت کی جائے کم ہے۔ پاکستان کشمیریوں کا وکیل اور محسن ہے اس نے یہ معاملہ اٹھایا ہے ان کا شکریہ ادا کرتے ہیں۔ اس موقع پر وزیر صحت ڈاکٹر نجیب نقی خان ، چیف سیکرٹری مطہر نیاز رانا ، پرنسپل سیکرٹری راجہ امجد پرویز ، آئی جی پولیس اور دیگر اعلیٰ حکام بھی موجود تھے۔