پنجاب کے بعد بلوچستان اور اسلام آباد میں بھی چاند نظر نہیں آیا

شوال کا چاند دیکھنے کیلئے مرکزی رویت ہلال کمیٹی کا اجلاس کراچی میں جاری، اب تک ملک کے کسی حصے سے کوئی شہادت موصول نہیں ہوئی

محمد علی ہفتہ 23 مئی 2020 20:41

کراچی (اُردو پوائنٹ اخبارتازہ ترین۔ 23 مئی2020ء) پنجاب کے بعد بلوچستان اور اسلام آباد میں بھی چاند نظر نہیں آیا، شوال کا چاند دیکھنے کیلئے مرکزی رویت ہلال کمیٹی کا اجلاس کراچی میں جاری، اب تک ملک کے کسی حصے سے کوئی شہادت موصول نہیں ہوئی۔ تفصیلات کے مطابق شوال کا چاند دیکھنے کیلئے مرکزی رویت ہلال کمیٹی کا اجلاس آج 23 مئی بروز اتوار، 29 رمضان المبارک کو کراچی میں طلب کیا گیا تھا جو اب تک جاری ہے۔

اجلاس کی صدارت مفتی منیب الرحمان کر رہے ہیں۔ جبکہ ملک بھر میں زونل رویت ہلال کمیٹیوں کے اجلاس بھی جاری ہیں۔ بتایا گیا ہے کہ اجلاس کے دوران اب تک ملک کے کسی حصے سے شوال کا چاند نظر آنے کی کوئی شہادت موصول نہیں ہوئی۔ ماہرین موسمیات نے بتایا تھا کہ بلوچستان کے علاقے پسنی میں چاند نظر آنے کے کچھ امکانات موجود تھے تاہم چاند 8 بج کر 28 منٹ نہ دیکھا جا سکا، جس کے بعد اس علاقے میں بھی چاند نظر آنے کے امکانات ختم ہو گئے۔

(جاری ہے)

یہ بھی بتایا گیا کہ کوئٹہ میں مطلع صاف ہے۔ تاہم چاند کی رویت کے امکانات نہیں۔ کوئٹہ اور گردونواح میں چاند نظر آنے کے امکانات کم ہیں۔ اسلام آباد میں چاند دیکھنے کیلئے مطلع صاف ہے۔ لیکن اسلام آباد میں چاند نظر آنے کے امکانات بہت کم ہیں۔ جبکہ اب پنجاب، اسلام آباد اور بلوچستان کی زونل رویت ہلال کمیٹیوں نے مرکزی رویت ہلال کمیٹی کو آگاہ کیا ہے کہ ان علاقوں میں شوال کا چاند نظر نہیں آیا۔

یہاں یہ واضح رہے کہ وفاقی وزیر برائے سائنس و ٹیکنالوجی فواد چوہدری نے اعلان کیا ہے کہ ان کی وزارت کی جانب سے جاری کردہ قمری کلینڈر درست ہے، اور اسی کے مطابق عید کل 24 مئی بروز اتوار کو ہوگی۔ وزارت مذہبی امور نے فواد چوہدری کا اعلان مسترد کرتے ہوئے کہا ہے کہ ملک میں عید الفطر منانے کا حتمی فیصلہ رویت ہلال کمیٹی کے اعلان کے مطابق کیا جائے گا۔

جبکہ ماہرین فلکیات اور موسمیات کی جانب سے بتایا گیا ہے کہ آج کے دن پاکستان میں شوال کا چاند نظر آنے کے امکانات نہ ہونے کے برابر ہیں، اس لیے قوی امکان ہے کہ ملک میں عید الفطر 30 روزے پورے ہونے کے بعد 25 مئی بروز پیر کو منائی جائے گی۔ جبکہ یہاں یہ بھی واضح رہے کہ پشاور میں مسجد قاسم علی خان کے امیر مفتی پوپلزئی کل ہی اعلان کر چکے ہیں کہ وہ 24 مئی بروز اتوار کو عید الفطر منائیں گے۔