وزیراعظم آزاد کشمیر راجہ فاروق حیدر خان کا شہباز شریف اورمریم نواز کو ٹیلیفون ،

محمد نوازشریف کی صحت کے بارے میں دریافت کیا

بدھ 27 مئی 2020 18:19

وزیراعظم آزاد کشمیر راجہ فاروق حیدر خان کا شہباز شریف اورمریم نواز ..

اسلام آباد ۔ (اُردو پوائنٹ اخبارتازہ ترین - اے پی پی۔ 27 مئی2020ء) وزیراعظم آزاد کشمیر راجہ فاروق حیدر خان نے صدر مسلم لیگ (ن) شہباز شریف کو ٹیلیفون کیا اور صدر مسلم لیگ (ن) کی صحت کے بارے میں دریافت کیا۔ انھوں نے نائب صدر مسلم لیگ (ن) مریم نواز سے بھی ٹیلیفون پر بات کی اور قائد مسلم لیگ (ن) محمد نوازشریف کی صحت کے بارے میں دریافت کیا۔ وزیراعظم آزاد کشمیر میڈیا آفس سے جاری بیان کے مطابق وزیراعظم نے کہا کہ آزاد کشمیر میں مسلم لیگ (ن) کی حکومت قائد مسلم لیگ (ن) محمد نواز شریف کے وژن کے مطابق کشمیری عوام کی خدمت میں مصروف عمل ہے۔

وزیراعظم آزاد کشمیر نے کہا کہ قائد مسلم لیگ (ن) کی رہنمائی اور سرپرستی میں آزاد کشمیر کے اندر کئی دہائیوں سے زیر التواء مسائل حل ہوئے۔

(جاری ہے)

آزاد کشمیر کو بااختیار بنانے اور ترقیاتی بجٹ دوگنا کرنے اور خطہ کو سی پیک میں شامل کرنے سمیت قومی دھارے میں بھرپور نمائندگی پر مسلم لیگ (ن) کے شکرگزار ہیں۔ وزیراعظم آزاد کشمیر نے کہا کہ محمد نوازشریف کی رہنمائی اور سرپرستی میں مسلم لیگ (ن) اگلے ایک سال مزید ڈٹ کر عوامی خدمت کرے گی اور آئندہ انتخابات میں بھی دو تہائی اکثریت سے کامیاب ہو گی۔

شہباز شریف اور مریم نواز نے مقبوضہ کشمیر میں ہندوستانی فوج کے مظالم کی شدید مذمت کی۔ دونوں رہنماوں نے مقبوضہ کشمیر کے مظلوم عوام سے اظہار یکجہتی کیا۔ صدر مسلم لیگ (ن) محمد شہباز شریف اور نائب صدر مریم نواز شریف کی جانب سے کورونا وائرس سے نمٹنے کیلئے آزاد کشمیر حکومت کے بروقت اقدامات پر وزیراعظم آزاد کشمیر اور ان کی ٹیم کو خراج تحسین پیش کیاگیا۔