محکمہ موسمیات اقوام متحدہ اور عالمی بینک کے تعاون سے دو منصوبوں پر کام کررہا ہے‘ ڈاکٹر خالد ملک

لاہور(اُردو پوائنٹ اخبارتازہ ترین - این این آئی۔ 18 ستمبر2020ء) محکمہ موسمیات کے ڈائریکٹراورترجمان ڈاکٹر خالد ملک نے کہا ہے کہ موسمیاتی نظام میں تبدیلی سے قدرتی موسم متاثر ہوا ہے جس کے نتیجے میں سندھ خصوصاً کراچی میں سیلاب کی صورتحال پیدا ہوئی۔سرکاری ریڈیو سے گفتگو کرتے ہوئے انہوں نے کہاکہ امسال جون میں سندھ سمیت ملک کے مختلف حصوں میں اگست کے مہینے میں 20فیصد اضافی بارش ہونے کے خطرے کے بارے میں خبردار کر دیاتھا۔

(جاری ہے)

انہوںنے کہاکہ کراچی کا نکاسی آب کا نظام اتنا مضبوط نہیں تھا کہ وہ 600 ملی میٹر بارش کا مقابلہ کرسکتا جس کی وجہ سے شہر میں شدید سیلاب کی صورتحال پیدا ہوگئی ۔ڈاکٹر خالد ملک نے کہا کہ پاکستان کا محکمہ موسمیات دو منصوبوں پر کام کررہا ہے،پہلے منصوبے کے لئے فنڈز اقوام متحدہ کا ترقیاتی پروگرام فراہم کرے گا جس کا مقصد برفانی تودوں اور وادیوں میں موجودہ صورتحال کی نگرانی اور گلگت اور خیبرپختونخوا ہ میں پیشگی خبردار کرنے کے نظام کی تنصیب ہے۔انہوں نے کہا کہ پانچ سال کے دورانیے کے دوسرے منصوبے جس کے لئے فنڈز عالمی بینک فراہم کرے گا اس سال کے آخر میں شروع ہوگا جس کے تحت پاکستان میںریڈار سسٹم نصب اور موسم سے متعلق بنیادی ڈھانچے کو بہتر بنایا جائے گا۔