نجی ائیرلائنز نے بھی سعودی عرب کی کرایوں میں اضافہ کر دیا

غیر ملکی ائیرلائنز کی ٹکٹ کی قیمت 1 لاکھ 1 ہزار روپے سے بڑھ ک 1 لاکھ 40 ہزار روپے تک پہنچ گئی

muhammad ali محمد علی پیر ستمبر 22:57

نجی ائیرلائنز نے بھی سعودی عرب کی کرایوں میں اضافہ کر دیا
لاہور(اُردو پوائنٹ تازہ ترین اخبار۔21 ستمبر2020ء) نجی ائیرلائنز نے بھی سعودی عرب کی کرایوں میں اضافہ کر دیا،غیر ملکی ائیرلائن کی ٹکٹ کی قیمت 1 لاکھ 1 ہزار روپے سے بڑھ ک 1 لاکھ 40 ہزار روپے تک پہنچ گئی۔ تفصیلات کے مطابق پاکستان میں پھنسے تارکین وطن پاکستانیوں کیلئے سعودی عرب واپس جانا بہت مشکل ہوگیا ہے۔ بتایا گیا ہے کہ نجی ائیرلائنز نے بھی موقعے کا فائدہ اٹھا کر سعودی عرب کی پروازوں کے کرایوں میں ہوشربا اضافہ کر دیا ہے۔

میڈیا رپورٹس کے مطابق اس وقت نجی ائیرلائنز سعودی عرب کی پروازوں کا کرایہ 1 لاکھ 40 ہزار روپے فی سواری چارج کر رہی ہیں۔ اس سے قبل نجی ائیرلائن کا کرایہ 1 لاکھ 1 ہزار روپے تک تھا۔ دوسری جانب قومی ائیرلائن پی آئی اے کی جانب سے بھی سعودی عرب کی پروازوں کے کرایوں میں یکدم ہوشربا اضافہ کر دیا گیا ہے۔

(جاری ہے)

پی آئی اے حکام کے مطابق کرونا ایس او پیز کے تحت ہر پرواز میں 25 فیصد نشستیں خالی چھوڑی جا رہی ہیں، اسی باعث کرایوں میں اضافہ کرنے پر مجبور ہوئے۔

پی آئی اے کے اس فیصلے کے بعد کراچی سے جدہ ، مدینہ یا دمام کیلئے یک طرفہ کرایہ 1 لاکھ 27 ہزار روپے کردیا گیا جب کہ لاہور ، اسلام آباد یا پشاور سے جدہ اور مدینہ کا کرایہ 1 لاکھ 33 ہزار روپے کردیا گیا۔ لاہور اسلام آباد یا پشاور سے ریاض اور دمام کا یک طرفہ کرایہ 1 لاکھ 31 ہزار روپے کر دیا گیا ہے۔ بتایا گیا ہے کہ اس فیصلے سے قبل پاکستان سے سعودی عرب کا کرایہ 84 ہزار تھا۔

پی آئی اے نے اپنے تمام ٹریول ایجنٹس کو نئے کرایوں سے آگاہ کر دیا۔ دوسری جانب پاکستان کی درخواست پر سعودی حکومت نے سعودی عرب کیلئے اضافی پروازیں چلانے کی اجازت دے دی ہے۔ بتایا گیا ہے کہ سعودی حکومت کی اجازت کے بعد 30 ستمبر تک کل 13 اضافہ پروازوں سے 3 ہزار پاکستانیوں کو سعودی عرب پہنچایا جائے گا۔ مسافروں کے رش دیکھتے ہوئے پی آئی اے نے مزید 28 پروازیں چلانے کی اجازت مانگ لی تھی۔ تاہم اب صرف 13 اضافی پروازوں کی اجازت ملی ہے۔ اعلان کیا گیا ہے کہ پاکستان سے سعودی عرب جانے والی پروازوں کے ٹکٹس پہلے آئیں پہلے پائیں کے تحت فروخت کی جا رہی ہیں۔