ملاقاتوں کے دوران زبیر عمر نے نواز شریف اور مریم نواز کے مقدمات اور سیاسی معاملات پر گفتگو کی

راولپنڈی (اُردو پوائنٹ اخبارتازہ ترین۔ 23 ستمبر2020ء) ترجمان پاک فوج میجر جنرل بابر افتخار کے مطابق ملاقاتوں کے دوران زبیر عمر نے نواز شریف اور مریم نواز کے مقدمات اور سیاسی معاملات پر گفتگو کی، آرمی چیف نے واضح کیا کہ سیاسی معاملات کا تعلق پارلیمنٹ اور قانونی معاملات کا تعلق پاکستان کی عدلیہ سے ہے، فوج کو ان معاملات سے دور رکھا جائے۔ تفصیلات کے مطابق پاک فوج کے شعبہ تعلقات عامہ کے سربراہ میجر جنرل بابر افتخار کی جانب سے نجی ٹی وی چینل کے پروگرام سے گفتگو کرتے ہوئے بڑا انکشاف کیا گیا ہے۔

ترجمان پاک فوج نے رہنما ن لیگ زبیر عمر اور آرمی چیف کی ملاقات کے حوالے سے بتایا ہے کہ ملاقاتوں کے دوران زبیر عمر نے نواز شریف اور مریم نواز کے مقدمات اور سیاسی معاملات پر گفتگو کی۔

(جاری ہے)

اس حوالے سے آرمی چیف نے واضح کیا کہ سیاسی معاملات کا تعلق پارلیمنٹ اور قانونی معاملات کا تعلق پاکستان کی عدلیہ سے ہے۔ آرمی چیف نے رہنما ن لیگ سے کہا کہ سیاسی معاملات پارلیمنٹ میں طے کیے جائیں، فوج کو سیاسی معاملات سے دور رکھا جائے۔

جبکہ قانونی مسائل کا حل بھی عدالتوں میں ہے۔ ڈی جی آئی ایس پی آر کی جانب سے بتایا گیا ہے کہ سابق گورنر سندھ زبیر عمر نے قائد ن لیگ نواز شریف اور مریم نواز کے حوالے سے 2 مرتبہ آرمی چیف جنرل قمر باجوہ سے ملاقات کی۔ پہلی ملاقات اگست کے آخری ہفتے میں جبکہ دوسری ملاقات 7 ستمبر کو ہوئی۔ زبیر عمر اور آرمی چیف جنرل قمر باجوہ کے درمیان ہوئی ملاقاتوں میں ڈی جی آئی ایس آئی جنرل فیض بھی شریک تھے۔

واضح رہے کہ نواز شریف کی صاحبزادی مریم نواز کی جانب سے بدھ کے روز جاری بیان میں دعویٰ کیا گیا تھا کہ نواز شریف کی کسی قریبی شخصیت نے آرمی چیف سے ملاقات نہیں کی، تاہم اب ترجمان پاک فوج نے ن لیگ کے اہم ترین رہنما زبیر عمر کی جنرل قمر باجوہ سے ہوئی ملاقاتوں کی تصدیق کر دی ہے۔ اس تمام معاملے کے حوالے سے سینئر صحافی کاشف عباسی کا کہنا ہے کہ یہ ملاقاتیں دراصل نواز شریف اور مریم نواز کی ہدایت پر ہی کی گئیں۔