کوہلو میں ہنگامی صورتحال سے نمٹنے کیلئے سہولیات کا فقدان ،ہزاروں افراد کی زندگیاں حالات کے رحم وکرم پر

اتوار 9 مئی 2021 21:00

کوہلو(اُردو پوائنٹ اخبارتازہ ترین - این این آئی۔ 09 مئی2021ء) کوہلو میںہنگامی صورتحال سے نمٹنے کیلئے سہولیات کا فقدان ،ہزاروں نفوس آبادی حالات کے رحم وکرم پر ہیں آتشزدگی ،زلزلے طوفانوں سے نمٹنے کیلئے کوئی تیاری نہیں ،ضروری آلات کی عدم دستیابی اور تجربہ کار افراد کا فقدان ہے ۔تفصیلات کے مطابق پونے دولاکھ نفوس پر مشتمل آبادی کیلئے ضلعی انتظامیہ اور بلدیاتی اداروں کے پاس ناگہانی اور قدرتی آفات سے نمٹنے کیلئے کوئی بھی سہولیات موجود نہیں ہے کسی بھی غیر متوقع صورتحال کا سامنا کرنے کیلئے کسی بھی سطح پر درکار ضروری آلات اور تربیت یافتہ عملے کا وجود ہی نہیں ہے ضلع کی آبادی پونے دو لاکھ سے زائد ہے لیکن سیلاب ،طوفان ،زلزلہ ،عمارت کی تباہی ،آتشزدگی ،زہریلی گیس کا اخراج اور کیمیکل سپیلج جیسی آفات سے نمٹنے کیلئے ضلعی انتظامیہ باالخصوص میونسپل کارپوریشن کی طرف سے کوئی خاطرخواہ انتظامات نہیں کئے گئے ہیں ۔

(جاری ہے)

ملک کے دیگر چھوٹے بڑے شہروں میں جہاں ریسکیو کے مختلف شعبہ جات ایسے واقعات کے دوران الرٹ رہ کر کام کرتے ہیں لیکن بدقسمتی سے ضلع بھر میں کہیں پر کوئی ایمرجنسی اور ناگہانی واقعات و آفات کے موقع پر فائر فائیٹنگ و دیگر آلات و مشینری تک دستیاب نہیں جبکہ تربیت یافتہ عملہ کی بھی شدید قحط الرجال ہے جس کے باعث لاکھوں کی آبادی پر مشتمل ضلع میں کسی بھی ناگہانی وقدرتی آفات و واقعات پر سہولیات کی عدم دستیابی سے خدانخواستہ کسی بڑی تباہی کا پیشہ خیمہ ثابت ہوسکتا ہے عوامی حلقوں نے وزیراعلی بلوچستان ،چیف سیکرٹری بلوچستان ،سیکرٹری بلدیات ،کمشنر سبی ڈویژن واعلی حکام سے مطالبہ کرتے ہوئے کہا کہ ضلع میں ناگہانی آفات سے نمٹنے کیلئے فوری طور پر جدید مشینری و آلات فراہم کرنے کے ساتھ تربیت یافتہ عملے کی تعیناتی کو بھی عمل میں لایا جائے ۔