شہبازشریف کی تقریر ہر پاکستانی کے درد کی نمائندگی ہے، مریم نواز

ملکی معاشی بدحالی کا درد ہر پاکستانی محسوس کرتا ہے، شہبازشریف نے آئی ایم ایف کے دباؤ پر معاشی بدحالی اور مہنگائی کے خدشات پر قوم کی ترجمانی کی ہے، نائب صدر ن لیگ کا ٹویٹ

ثنااللہ ناگرہ جمعرات 17 جون 2021 17:01

شہبازشریف کی تقریر ہر پاکستانی کے درد کی نمائندگی ہے، مریم نواز

اسلام آباد (اردوپوائنٹ اخبارتازہ ترین۔ 17 جون2021ء) پاکستان مسلم لیگ ن کی مرکزی نائب صدر مریم نواز نے کہا ہے کہ پاکستان کی معاشی بدحالی کا درد ہر پاکستانی محسوس کرتا ہے، شہبازشریف کی تقریر ہر پاکستانی کے درد کی نمائندگی ہے۔ انہوں نے ٹویٹر پر اپنے بیان میں کہا کہ شہبازشریف نے آئی ایم ایف کے دباؤ پر معاشی بدحالی اور مہنگائی کے خدشات پر قوم کی ترجمانی کی ہے، انہوں نے کہا کہ آج ہر پاکستانی پاکستان معیشت کی صورتحال پر دیکھ رہا ہے۔

یاد رہے قائد حزب اختلاف اور صدر مسلم لیگ ن میاں شہبازشریف نے قومی اسمبلی میں اظہار خیال کرتے ہوئے کہا کہ حکومت نے وزیراعظم کی منظوری سے11 لاکھ ٹن چینی برآمد کی،چینی برآمد کرنے پراربوں روپے سبسڈی دی گئی، نوازشریف دورمیں سرکاری اسپتالوں میں مفت ادویات تھیں، آج ماڈرن ہاؤسنگ اسکیموں کو 50 لاکھ گھروں میں شامل کیا جارہا۔

(جاری ہے)

پی ٹی آئی حکومت آتے ہی جی ڈی پی ایک سے بھی کم سطح پرآگئی، مزدور کی تنخواہ 3 سال میں 18 فیصد کم ہوچکی، ہمارے دور میں پنجاب میں 10سال میں لاکھوں اساتذہ بھرتی ہوئے۔

ہم نے دہشت گردی کے خاتمے کے لیے کوششیں کیں، ہم نے دہشت گردی کے خاتمے کے لیے بہت قربانیاں دیں۔ چور چور کے نعرے لگانے سے ترقی نہیں ہوتی، ہمارے دور میں عمران خان کو منانے کی کوشش کی گئی۔ وزیرخزانہ نے کہا نیا ٹیکس نہیں لگے گا لیکن 383 ارب روپے کے ٹیکس لگائے جارہے ہیں۔ انکم پر 120ارب روپے کے مزید ٹیکس لگنے جارہے ہیں، خام تیل اور ایل این جی پر 17فیصد ٹیکس لگایا جارہا ہے، حکومت ٹیکس لگا کر کیا حاصل کرنا چاہتی ہے؟ تین برسوں میں دو کروڑ سے زائد غربت کی لکیر سے نیچے چلے گئے۔آج جتنی بھرتیاں ہورہی ہیں اس سے تجوریاں بھری جارہی ہیں، ہم نے لاکھوں بھرتیاں کیں، ایک ڈنڈی ثابت ہوجائے آپ کا ہاتھ میرا گریبان ہوگا۔