Live Updates

ظالم حکمران جونکوں کی طرح غریبوں کا خون چوس رہے ہیں ‘ سراج الحق

مہنگائی کا جن عوام کا سب کچھ کھا گیا ،بجٹ سود خوروں اور سرمایہ داروں کو مزید مضبوط کرے گا ‘ امیر جماعت اسلامی

جمعرات جون 22:39

ظالم حکمران جونکوں کی طرح غریبوں کا خون چوس رہے ہیں ‘ سراج الحق
لاہور(اُردو پوائنٹ اخبارتازہ ترین - این این آئی۔ 17 جون2021ء) امیر جماعت اسلامی سراج الحق نے کہا ہے کہ قومی اسمبلی کے ہنگامہ نے بجٹ کی مجموعی شکل کو دھندلا کردیا ، حقائق سامنے آئے تو عوام مزید بلبلائیں گے، حکومت اور اپوزیشن کا رویہ انتہائی قابل افسوس ہے ۔ ظالم حکمران جونکوں کی طرح غریبوں کا خون چوس رہے ہیں ، ملک کے 75 فیصد عوام کے نزدیک مہنگائی ، بے روزگاری ، غربت اور بے جا ٹیکسز بڑے مسائل ہیں ،پی ٹی آئی بتائے ان اژدھوں سے نمٹنے کے لیے بجٹ میں کیا اقدامات کیے ہیں ، مہنگائی کا جن عوام کا سب کچھ کھا گیا ،بجٹ سود خوروں اور سرمایہ داروں کو مزید مضبوط کرے گا ،پی ٹی آئی ، نو ن لیگ اور پی پی نے اپنے اپنے ادوار میں عوامی مسائل کے حل میں مکمل ناکام رہیں ، نوجوان سٹیٹس کو سے نجات کے لیے کردار ادا کریں ، جماعت کے دروازے یوتھ کے لیے کھلے ہیں ،آئیے مل کر انسانوں کو انسانوں کی غلامی سے آزاد کرانے کے لیے میدان عمل میں نکلیں ، یقین سے کہتاہوں کہ جس دن بوتھ آزاد ہوا یوتھ فلاحی پاکستان کے قیام کے لیے جماعت اسلامی کے ساتھ کھڑی ہوگی ۔

(جاری ہے)

ان خیالات کااظہار انہوں نے منصورہ میں یوتھ بورڈ کے اجلاس کی صدارت کرتے ہوئے کیا ۔ سیکرٹری جنرل جماعت اسلامی امیر العظیم ، سیکرٹری اطلاعات قیصر شریف ، امیر جماعت اسلامی شمالی پنجاب ڈاکٹر طارق سلیم ، امیر جماعت وسطی پنجاب جاویدقصوری اور جے آئی یوتھ کے صدر زبیر گوندل نے دیگر ممبران کے ہمراہ اجلاس میں شرکت کی ۔میٹنگ میں بلدیاتی الیکشن کی تیاریوں ، بلاک کوڈ کی سطح پر نوجوانوں کی تنظیم سازی اور نوجوان طبقہ کو درپیش مسائل سے متعلق گفتگو ہوئی اور تجاویز دی گئیں ۔

امیر جماعت نے جے آئی یوتھ کو ہدایت کی کہ وہ ملک کے نوجوانوں کی دینی و اخلاقی تربیت کو اپنا مشن بنائے ۔ وسائل کے مطابق ہر ضلع میں صحت مندانہ سرگرمیوں اور تربیتی پروگراموں کا انعقاد کیا جائے اور نوجوانوں کو سماجی ، سیاسی ، تعلیمی اور دیگر میدانوں میں آگے آنے کے مواقع فراہم کیے جائیں ۔ اجلاس سے خطاب کرتے ہوئے سراج الحق نے اس امر پر مسرت کا اظہار کیا کہ جماعت اسلامی کا نظریہ تیزی سے نوجوانوں میں مقبولیت پارہاہے ۔

انہوں نے کہاکہ تینوں بڑی سیاسی جماعتوں نے اقتدار میں آکر نہ صرف جمہوریت کو کمزور کیا بلکہ ملک کے پہلے سے موجود مسائل میں مزید اضافہ کیا ۔ جاگیرداروں اور سرمایہ داروں کی پارٹیوں میں عام پڑھے لکھے افراد کی کوئی گنجائش نہیں ۔ عام لوگوں کو اگر اپنی آواز کو توانا اور مضبوط کرنا ہے تو جماعت اسلامی کا پلیٹ فارم استعمال کریں۔ انہوں نے کہاکہ ارب پتی طبقہ دھونس اور دولت کے بل بوتے پر الیکشن جیت کر میرٹ کی دھجیاں اڑاتااور اداروں کو کمزور کرتاہے ۔

بائیس کروڑ عوام گزشتہ کئی دہائیوں سے ان ظالموں کو بھگت رہے ہیں ۔ انہوں نے کہاکہ ضرورت اس امر کی ہے کہ جماعت اسلامی سے وابستہ افراد عوام میں آگہی پیدا کریں ۔ انہوں نے کہاکہ اس میں کوئی شک نہیں کہ قوم کی اکثریت حکمرانوں کے چہروں کو خوب پہچان گئی اور ان سے بدظن ہوچکی ہے ۔پارلیمنٹ میں ہونے والی ہلڑ بازی اور گالم گلوچ پر اظہار افسوس کرتے ہوئے امیر جماعت نے کہاکہ جو لوگ اس عمل میں ملوث تھے، وہ قوم سے معافی مانگیں ۔

یہ انتہائی شرم کا مقام ہے کہ اپنے آپ کو عوام کا نمائندہ کہنے والوں نے بدتہذیبی کی بدترین مثالیں قائم کیں ۔ اسی طرح کی حرکات سے پہلے سے کمزور جمہوریت مزید کمزور ہوتی ہے ۔انہوں نے عوام سے اپیل کی کہ وہ صالح اور دیانتدار لوگوں کو آگے لائیں تاکہ ان کے مسائل حل ہوسکیں اور پاکستان حقیقی معنوں میں اسلامی جمہوری ریاست بن سکے ۔پاکستان اسی صورت آگے بڑھے گا جب نظام مصطفیؐ نافذ ہوگا۔
آزاد کشمیر انتخابات سے متعلق تازہ ترین معلومات