Live Updates

افغانستان میں خانہ جنگی زور پکڑنے لگی،لوگو ں کے چہرے پر مسکراہٹ بکھیرنے والا بے دردی سے قتل

معروف کامیڈین کو بدترین تشدد کے بعد قتل کر دیا گیا،طالبان کا ذمہ داری قبول کرنے سے انکار

Sajjad Qadir سجاد قادر جمعرات 29 جولائی 2021 07:28

افغانستان میں خانہ جنگی زور پکڑنے لگی،لوگو ں کے چہرے پر مسکراہٹ بکھیرنے ..
قندھار (اردو پوائنٹ تازہ ترین اخبار ۔ 29 جولائی 2021ء )  مشہور افغان مزاحیہ اداکار نذر محمد المعروف ’خاشا زوان‘ کو مبینہ طور پر طالبان نے اغوا کے بعد بدترین کا تشدد کا نشانہ بناکر قتل کر دیا تاہم طالبان نے اس کی تردید کی ہے۔طلوع نیوز کے مطابق قندھار کے کامیڈین خاشازوان کی تشدد زدہ لاش ملی ہے، اُن کے اہل خانہ نے قتل کا ذمہ دار طالبان کو ٹھہرایا ہے تاہم طالبان نے اداکار کے قتل میں ملوث ہونے کی تردید کی ہے۔

جنگ زدہ صوبے قندھار میں طالبان نے اکثر علاقوں میں جھڑپوں کے بعد کنٹرول حاصل کرلیا اور اسی دوران مزاحیہ اداکار نذر محمد کو جمعرات کے روز سادہ لباس میں ملبوس مسلح افراد نے اغوا کیا اور منگل کو ان کی لاش مل گئی۔

سوشل میڈیا پر وائرل ہونے والی ایک ویڈیو میں دیکھا جا سکتا ہے کہ مسلح افراد نے اداکار کے ہاتھ پشت پر باندھ گاڑی میں بٹھایا ہوا ہے اور منہ پر تھپڑ مار رہے ہیں۔

(جاری ہے)

تھپڑ مارنے والا شخص اداکار کو مغلظات بھی بک رہا ہے۔ٹویٹر پر صارفین نے قتل کی مذمت کرتے ہوئے لکھا کہ جنگ زدہ قوم کے چہروں پر مسکراہٹ بکھیرنے والے کامیڈین کو بے دردی سے قتل کردیا گیا جس نے مرنے سے کچھ دیر پہلے اپنے قاتلوں کو بھی ہنسانے کی کوشش کی تھی۔واضح رہے کہ افغانستان میں ترجمان طالبان ڈاکٹر نعیم نے چند روز قبل اپنے ایک بیان میں کہا تھا کہ طالبان کی فتح سے خوف زدہ ذہنوں نے خود ساختہ اور گمراہ کن تصاویر، ویڈیوز اور جھوٹی خبریں پھیلانا شروع کردی ہیں جن کا طالبان سے کچھ لینا دینا نہیں۔یاد رہے کہ اہل خانہ نے قتل کا ذمہ دار طالبان کو ٹھہرایا ہے تاہم طالبان نے اداکار کے قتل میں ملوث ہونے کی تردید کی ہے۔

Live کابل میں طالبان کا کنٹرول سے متعلق تازہ ترین معلومات