سپیکر پنجاب اسمبلی سے آزاد جموں وکشمیر کے صد ر بیرسٹر سلطان محمود چودھری کی ملاقات

پاکستان مسئلہ کشمیر کے منصفانہ حل کے لیے کوشاں ہے اور ہر فورم پر موثر انداز میں اس مسئلہ کو اجاگر کر رہاہے‘پرویز الٰہی ہندوستان نے کشمیریوں کی تحریک آزادی کو کچلنے کے لیے تاریخ انسانی کے تمام مظالم کو مات دے دی ہے‘بیرسٹر سلطان محمود چودھری

منگل 21 ستمبر 2021 17:15

سپیکر پنجاب اسمبلی سے آزاد جموں وکشمیر کے صد ر بیرسٹر سلطان محمود ..

لاہور(اُردو پوائنٹ اخبارتازہ ترین - این این آئی۔ 21 ستمبر2021ء) سپیکر پنجاب اسمبلی چودھری پرویز الٰہی سے آزاد جموں وکشمیر کے صد ر بیرسٹر سلطان محمود چودھری نے اسمبلی چیمبرز میں ملاقات کی۔ آزاد جموں وکشمیر کے 05 رکنی پارلیمانی وفد میں ڈپٹی سپیکر ریاض گجرکے علاوہ قانون ساز اسمبلی کے ایم ایل ایز دیوان غلام محی الدین اور حافظ حامد رضاء شامل تھے۔

ملاقات میں باہمی دلچسپی اور خاص طور پر پارلیمانی امور پر تبادلہ خیال کیا گیا۔ اس موقع پر ڈپٹی سپیکر پنجاب اسمبلی سردار دوست محمد مزاری اور سیکرٹری پنجاب اسمبلی محمد خان بھٹی بھی موجود تھے۔ دوران ملاقات چودھری پرویز الٰہی نے کہا کہ پاکستان مسئلہ کشمیر کے منصفانہ حل کے لیے کوشاں ہے اور ہر فورم پر موثر انداز میں اس مسئلہ کو اجاگر کر رہاہے۔

(جاری ہے)

انہوں نے کہا کہ حصول آزادی کی جدوجہد میں کشمیری اکیلے نہیں ہیں بلکہ پاکستان کا بچہ بچہ ان کے ساتھ کھڑا ہے۔ صدر آزاد جموں و کشمیر بیرسٹر سلطان محمود چودھری نے کہا کہ ہندوستان نے کشمیریوں کی تحریک آزادی کو کچلنے کے لیے تاریخ انسانی کے تمام مظالم کو مات دے دی ہے۔ انہوں نے کہا کہ صحت،تعلیم اور دہشت گردی جیسے مسائل پر اجتماعی کوششوں سے ہی قابو پایا جا سکتا ہے۔

انہوں نے مزید کہا کہ کشمیر ی عوام بھارت کے پنجہء استبداد سے نجات حاصل کرنے کے لیے قربانیاں دے رہے ہیں۔ چودھری پرویز الٰہی نے کہا کہ ظلم اور جبر سے کشمیریوں کو ان کے حق آزادی سے محروم نہیں کیا جا سکتا۔ انہوں نے امید ظاہر کی کہ آزاد جموں و کشمیرکی موجودہ حکومت کشمیر کاز کو حل کرنے میں مد دگار ثابت ہو گی اور آزاد کشمیر میں ترقی و خوشحالی آئے گی۔

سپیکر نے کہا کہ ہندوستان گزشتہ74 سال گزرنے کے باوجود استصواب رائے سے پہلوتہی کر کے کشمیر پر غاصبانہ قبضہ جمائے ہوئے ہے۔ کشمیر یوںکی تیسری نسل غلامی کی زنجیروں سے آزادی کے لیے جدوجہدکرتے ہوئے جوان ہوگئی ہے۔ ایک لاکھ سے زائد کشمیر ی جوان شہید ہو چکے ہیں۔ بیرسٹر سلطان محمود چودھر ی نے پنجاب اسمبلی کی نئی عمارت کے فنگشنل ہونے پر مبارک باد اور ایوان کو قرآنی آیات اور احادیث مبارکہ سے مزین کرنے پر چودھری پرویز الٰہی کو خراجِ تحسین پیش کیا۔بعد ازاں سپیکرپنجاب اسمبلی نے صدر آزاد جموں و کشمیرکوپنجاب اسمبلی کے نئے ایوان اور مختلف شعبہ جات کا دورہ کر وایا۔