عمران خان نے یو این جنرل اسمبلی خطاب میں کشمیریوں کی بھرپور ترجمانی کر کے کشمیر کا سفیر ہونے کا حق ادا کر دیا،سردار عبدالقیوم نیازی

ْوزیراعظم پاکستان نے خطاب میں بھارتی مظالم پر عالمی برادری کے دہرے معیار کا تذکرہ کر کے عالمی ضمیر کو بھی جھنجھوڑا ،آر ایس ایس کے ہندوتا نظریے اور بھارت میں مسلمانوں پر مظالم کو بھی بے نقاب کیا ، وزیراعظم آزاد کشمیر

ہفتہ 25 ستمبر 2021 15:16

عمران خان نے یو این جنرل اسمبلی خطاب میں کشمیریوں کی بھرپور ترجمانی ..
اسلام آباد (اُردو پوائنٹ اخبارتازہ ترین - این این آئی۔ 25 ستمبر2021ء) وزیراعظم آزاد جموں وکشمیر سردار عبد القیوم نیازی نے کہا ہے کہ عمران خان نے یو این جنرل اسمبلی خطاب میں کشمیریوں کی بھرپور ترجمانی کر کے کشمیر کا سفیر ہونے کا حق ادا کر دیا،وزیراعظم پاکستان نے خطاب میں بھارتی مظالم پر عالمی برادری کے دہرے معیار کا تذکرہ کر کے عالمی ضمیر کو بھی جھنجھوڑا ،آر ایس ایس کے ہندوتا نظریے اور بھارت میں مسلمانوں پر مظالم کو بھی بے نقاب کیا ۔

وزیراعظم آزاد جموں وکشمیر سردار عبد القیوم نیازی نے اقوام متحدہ کی جنرل اسمبلی سے خطاب پر وزیراعظم پاکستان عمران خان کو زبردست خراجِ تحسین کرتے ہوئے کہاہے کہ عمران خان نے یو این جنرل اسمبلی خطاب میں کشمیریوں کی بھرپور ترجمانی کر کے کشمیر کا سفیر ہونے کا حق ادا کر دیا۔

(جاری ہے)

انہوں نے کہا کہ وزیر اعظم پاکستان نے فاشسٹ مودی کا چہرہ دنیا کے سامنے بے نقاب کر کے رکھ دیا ،وزیر اعظم نے سید علی گیلانی کی میت کے معاملے کو بھی بھرپور انداز سے اٹھایا،انہوں نے کہا کہ محسن کشمیر عمران خان نے اپنی تقریر سے کشمیریوں کے دل جیت لئے ہیں۔

انہوں نے کہا کہ عمران خان نے بھارتی مظالم پر عالمی برادری کے دوہرے معیار کا تذکرہ کر کے عالمی ضمیر کو بھی جھنجھوڑا ،سفیر کشمیر نے آر ایس ایس کے ہندوتا نظریے اور بھارت میں مسلمانوں پر مظالم کو بھی بے نقاب کیا ۔انہوں نے کہا کہ وزیراعظم کے جنرل اسمبلی سے خطاب سے مسئلہ کشمیر پر عالمی حمایت میں مزید اضافہ ہو گا۔انہوں نے کہا کہ مسئلہ کشمیر کو بھرپور طریقے سے اجاگر کرنے پر وزیراعظم پاکستان کے شکرگزار ہیں ۔