آرمی چیف جنرل قمر جاوید باجوہ سے امریکی نائب وزیرخارجہ کی ملاقات

امریکی وزیرخارجہ کا علاقائی امن کیلئے پاکستان کے ساتھ کام جاری رکھنے کا عزم، آرمی چیف نے پاک امریکا وسیع تعلقات کیلئے بامقصد رابطے جاری رکھنے کی ضرورت پر زور دیا۔ آئی ایس پی آر

ثنااللہ ناگرہ جمعہ 8 اکتوبر 2021 22:43

آرمی چیف جنرل قمر جاوید باجوہ سے امریکی نائب وزیرخارجہ کی ملاقات

راولپنڈی (اردوپوائنٹ اخبارتازہ ترین۔ 08 اکتوبر2021ء) آرمی چیف جنرل قمر جاوید باجوہ سے امریکی نائب وزیرخارجہ نے ملاقات کی، آرمی چیف نے دونوں ملکوں کے درمیان بامقصد رابطوں کی ضرورت پر زور دیا، پاکستان افغانستان میں پائیدار امن کیلئے تمام کوششوں کی حمایت کرتا ہے، امریکی نائب وزیرخارجہ نے کہا کہ علاقائی امن کیلئے پاکستان کے ساتھ کام جاری رکھنے کیلئے پرعزم ہیں۔

پاک فوج کے شعبہ تعلقات عامہ آئی ایس پی آر کے مطابق آرمی چیف جنرل قمر جاوید باجوہ سے امریکی نائب وزیرخارجہ نے ملاقات کی۔ ملاقات میں باہمی دلچسپی اور علاقائی سیکیورٹی کی صورتحال پر تبادلہ خیال کیا گیا، ملاقات میں افغانستان میں انسانی بنیادوں پر امور بھی زیر غور آئے۔ آرمی چیف جنرل قمر جاوید باجوہ نے کہا کہ پاکستان افغانستان میں امن اوراستحکام کیلئے ہرممکن کوششوں کے لیے پرعزم ہے، پاکستان افغانستان میں تمام دھڑوں پر مشتمل حکومت کے قیام کی بھرپور حمایت کرتا ہے، افغانستان میں پائیدار امن کیلئے تمام کوششوں کی حمایت کرتے ہیں۔

(جاری ہے)

آرمی چیف نے کہا کہ تمام فریقوں پر مشتمل افغان حکومت کی حمایت کرتے ہیں، پاکستان افغانستان میں امن اوراستحکام کیلئے ہرممکن کوششوں کیلئے پرعزم ہے، آرمی چیف نے دونوں ملکوں کے درمیان بامقصد رابطوں کی ضرورت پر زور دیا۔ اس موقع پر امریکی نائب وزیر خارجہ نے افغان صورتحال پر پاکستان کے کردار کو سراہتے ہوئے کہا کہ پاکستان کا افغانستان سے غیرملکیوں کے کامیاب انخلا میں تعاون قابل قدر رہا، علاقائی امن کیلئے پاکستان کے ساتھ کام جاری رکھنے کیلئے پرعزم ہیں۔