Live Updates

آپ سرٹیفائیڈ چورنی اور سیاسی چڑیل ہیں

آپ کے پیسے کون سے جنات یا چڑیلوں نے بیرون ملک منتقل کیے؟ آپ نے ٹھیک کہا نواز شریف کی طرح کوئی نہیں بن سکتا ،اتنا دھوکے باز واقعی کوئی نہیں بن سکتا، مریم نواز کی تنقید کے بعد حکومتی رہنماوں کا بھی جوابی وار

محمد علی بدھ 13 اکتوبر 2021 21:45

اسلام آباد (اُردو پوائنٹ اخبارتازہ ترین۔ 13 اکتوبر2021ء) حکومتی رہنماوں نے مریم نواز کو سرٹیفائیڈ چورنی اور سیاسی چڑیل قرار دے دیا۔ تفصیلات کے مطابق مریم نواز کی جانب سے وزیراعظم پر ذاتی نوعیت کے الزامات عائد کیے جانے کے بعد حکومتی رہنماوں کی جانب سے بھی نواز شریف کی صاحبزادی پر بھرپور جوابی وار کیے گئے ہیں۔ وزیرمملکت برائے اطلاعات فرخ حبیب ،وزیر مملکت زرتاج گل ،پارلیمانی سیکرٹری برائے قانون ملیکہ بخاری اور معاون خصوصی شہباز گل نے بدھ کے روز پریس کانفرنس کے دوران مریم نواز کو شدید تنقید کا نشانہ بنایا۔

اپنے بیان میں وزیر مملکت فرخ حبیب نے کہا کہ نواز شریف سزا یافتہ ہیں، ہم کیوں نواز شریف بنیں گے، نواز شریف مریم نواز کو مبارک ہوں۔ وزیر اعظم عمران خان کو ایک کروڑ 70 لاکھ پاکستانیوں نے ووٹ دیا۔

(جاری ہے)

وزیر مملکت فرخ حبیب کا کہنا تھا کہ عمران خان کی اپنی پہچان ہے، وہ قوم کے ہیرو ہیں۔وزیر اعظم عمران خان کے معاون خصوصی شہباز گِل نے کہا کہ جادو ٹونے کی باتیں ہمیں نہ سنائیں، جادو ٹونے، جنات کی باتیں آپ کے منہ سے اچھی نہیں لگتیں۔

انہوں نے کہاکہ آپ کے پیسے کون سے جنات یا چڑیلوں نے بیرون ملک منتقل کیے۔ نواز شریف بنا نہیں جاسکتا وہ پیدا ہوتا ہے۔انہوں نے کہا کہ نوازشریف روز پیدا نہیں ہوتے، ہر 200 سال بعد پیدا ہوتے ہیں، پہلے نواز شریف میر جعفر کی شکل میں پیدا ہوئے تھے۔شہباز گل نے کہا کہ مریم صفدرنے آج بھی عدالت میں رسیدیں نہیں دیں ، مریم صفدرنے قطری خط کی طرح یہ نہیں بتایا کہ رسیدیں کہاں ہیں انہوں نے کہا کہ شریف فیملی نے تاجروں سے بھتہ وصول کیا اور باہر بھجوایا ، شریف خاندان سے پاکستان کا کوئی ادارہ محفوظ نہیں رہا ،اجمل قصاب اور کلبھوشن کے معاملے پر شریف فیملی نے ملک دشمنی دکھائی۔

شہباز گل نے کہا کہ مریم صفدر نے ٹھیک کہا نواز شریف کی طرح کوئی نہیں بن سکتا ،اتنا دھوکے باز واقعی کوئی نہیں بن سکتا۔ میڈیا سے گفتگو کرتے ہوئے زرتاج گل نے کہاکہ ملک میں سرٹیفائیڈ چورنی جس کا پورٹ فولیو لوگوں کو بلیک میل کرنے کا ذخیرہ موجود ہے ،سینیٹ ، آزاد کشمیر ہر جگہ پی ایم ایل ن کو اس خاتون کی وجہ سے ناکامی کا سامنا کرنا پڑا،ملک کے قابل احترام اداروں کی تضحیک کرتی ہے یہی ان کا پورٹ فولیو ہے۔ ان کی زبان نہ ان کے کردار سے کوئی محفوظ ہے، آپ کی نہ سیاسی تربیت ہے نہ ہی کچھ اور ہے۔ گالی گلوچ بریگیڈ کی آپ سربراہ ہیں، آپ ایک سرٹیفائیڈ چور ہے، آپ نے صرف پاکستان سے منی لانڈرنگ کی ہے،آپ ریجیکٹڈ ہیں ہر طرح سے۔