راولپنڈی اسلام آباد میں 11 روز بعد راستے کُھل گئے، میٹرو سروس بھی بحال

جڑواں شہروں میں 11 روز کے بعد معمولات زندگی بحال ہو گئے

سمیرا فقیرحسین پیر 1 نومبر 2021 10:41

راولپنڈی اسلام آباد میں 11 روز بعد راستے کُھل گئے، میٹرو سروس بھی بحال

راولپنڈی/ اسلام آباد (اُردو پوائنٹ تازہ ترین اخبار۔ یکم نومبر 2021ء) : حکومت اور ٹی ایل پی کے درمیان معاہدہ طے پانے کے بعد معمولات زندگی بحال ہوگئے۔ تفصیلات کے مطابق حکومت اور کالعدم تنظیم کے درمیان نئے معاہدے کے بعد جڑواں شہروں میں 11 روز بعد معمولات زندگی بحال ہوگئے ہیں۔ کالعدم تنظیم ٹی ایل پی کا لانگ مارچ ختم ہونے کے بعد راولپنڈی میں 10 روزسےبندراستےکھول دیئےگئے۔

راولپنڈی کی مصروف مری روڈپر لگے کنٹینرز ہٹادیئے گئے۔ ٹریفک پولیس نےتمام رکاوٹیں ہٹادیں۔مری روڈصدرسےفیض آبادتک ٹریفک بحال ہو گئی۔مری روڈ پر قائم تمام تعلیمی ادارے، بینک اور کاروباری مراکز آج معمول کے مطابق کھلے ہیں، مظاہرین کو روکنے کے لیے مری روڈ پر لگائی گی تمام رکاوٹیں ہٹا دی گئی ہیں، مری روڈ کو مریڑ چوک سے فیض آباد انٹرچینج تک کھول دیا گیا، مری روڈ کی تمام رابطہ سڑکوں پر بھی ٹریفک رواں دواں ہے، میٹرو بس سروس اور پبلک ٹرانسپورٹ بھی بحال ہے۔

(جاری ہے)

اس کے علاوہ میٹرو بس انتظامیہ کے مطابق رحمان آباد اسٹیشن پولیس کی موجودگی کے باعث بند ہے، باقی تمام اسٹیشنز مسافروں کے لیے کھلے ہیں۔ دوسری جانب جی ٹی روڈ جہلم سے وزیرآباد تک بند ہے، نیشنل ہائی ویز پولیس کے مطابق جی ٹی روڈ پر کل تک ٹریفک بحال ہوجائے گی۔ راولپنڈی سے اسلام آباد کے درمیان میٹرو بس سروس بھی بحال کر دی گئی۔ سڑکیں اور میٹرو بس بند ہونے کی وجہ سے لوگوں کو مشکلات کا سامنا رہا۔

واضح رہے کہ گذشتہ روز حکومت پاکستان اور کالعدم تنظیم کے مابین اعتماد باہمی کے ماحول میں تفصیلی مذاکرات کے بعد اتفاق رائے سے معاہدہ طے پا گیا تھا۔ واضح رہے کہ ٹی ایل پی کے احتجاج اور دھرنے کی دھمکی کے پیش نظر جُڑواں شہروں میں مختلف شاہراہوں کو بند کیا گیا تھا جس سے ٹریفک کی روانی متاثر رہی۔ سڑکیں اور میٹرو بس بند ہونے کی وجہ سے لوگوں کو شدید مشکلات کا سامنا کرنا پڑا تھا۔