سرگودھا ‘ چک 85 شمالی سے سلانوالی تک 37 کروڑ 34 لاکھ روپے کی لاگت سے 19 کلو میٹر کارپٹ روڈ کے تعمیراتی منصوبے کا افتتاح کر دیاگیا

سرگودھا(اُردو پوائنٹ اخبارتازہ ترین - این این آئی۔ 02 نومبر2021ء) صوبائی پارلیمانی سیکرٹری ایکسائز وٹیکسیشن چوہدری فیصل فاروق چیمہ نے چک 85 شمالی سے سلانوالی تک 37 کروڑ 34 لاکھ روپے کی لاگت سے 19 کلو میٹر کارپٹ روڈ کے تعمیراتی منصوبے کا افتتاح کر دیا۔زرائع کے مطابق روڈ کی افتتاحی تقریب سے خطاب کرتے ہوئے ممبر قومی چوہدری عامر سلطان چیمہ‘ صوبائی پارلیمانی سیکرٹری چوہدری فیصل فاروق چیمہ‘ ضلعی چیئرمین وزیر اعلیٰ شکایات سیل چوہدری فیصل جاوید گھمن نے کہا کہ پاکستان اللہ تعالیٰ کے نیک بندوں اور عاشقانِ رسول کی دھرتی ہے جس کے غازی علم الدین شہید نے گساخ رسول ہندو کو جہنم واصل کرکے اس کے قتل کا جرم قبول کیا اور عشق ِ نبی? میں پھانسی چڑھ گئے۔

انہوں نے کہا کہ پاکستان کے خلاف نہ کوئی سازش پہلے کامیاب ہوئی نہ آئندہ ہو گی اور انشااللہ اللہ تعالی اور اس کے پیارے رسول? کے نام پر قائم ہونے والا یہ ملک قیامت تک قائم رہے گا۔

(جاری ہے)

انہوں نے کہا کہ علاقائی تعمیر وترقی اور عوامی خدمت کا جذبہ ہمیں ورثہ میں ملا ہے۔انہوں نے کہا کہ ہمارے باپ دادا بھی عوام کی خدمت کرتے رہے ہیں۔انہوں نے کہا کہ تاریخ گواہ ہے کہ سلانوالی روڈ سب سے پہلے ہمارے بزرگ ڈاکٹر نصراللہ خان گھمن نے بنوائی‘ہمارے خاندان کا فخر سابق وفاقی وزیر چوہدری انور علی چیمہ نے اس روڈ کی توسیع وتعمیر کرائی اور آج ہماری کوششوں سے اس روڈ کی کارپٹ کا کام شروع ہونے جارہا ہے۔

ان کا کہنا تھا کہ ہم تھانہ کچہری کی سیاست کے قائل نہیں ہیں‘ عوام کی خدمت اور علاقائی تعمیرو ترقی ہی ہمارا مشن ہے‘علاقے میں امن و امان کا قیام ہمیشہ ہماری خواہش رہی ہے۔ انہوں نے کہا کہ کورونا نے پوری دنیا کی معیشت پر برے اثرات ڈالے ہیں پاکستانی معیشت بھی بری طرح متاثر ہوئی جس سے مہنگائی میں اضافہ ہوا‘ روزگار کے زیادہ مواقع فراہم نہیں ہو سکے سابقہ حکومتوں کی غلط پالیسیوں‘آئی ایم ایف اور دیگر مالیاتی اداروں سے لئے گئے قرضوں کا بوجھ بھی پی ٹی آئی کی موجودہ حکومت کو برداشت کرنا پڑا۔

انہوں نے کہا کہ مسلم لیگ ن نے اپنے دور میں کوئی ترقیاتی کام نہیں کرائے حالانکہ ان کے دور میں معاشی حالات سازگار تھے اس کے باوجود عوام کا ن لیگ کے امیدواروں کو ووٹ دینا سمجھ سے بالا تر ہے۔ انہوں نے کہا کہ معاشی حالات بہتر نہ ہونے کے باوجود وزیر اعظم عمران خان اور وزیر اعلیٰ عثمان بزدار کی قیادت میں عوام کو بنیادی سہولیات فراہم کرنے کے لئے اربوں روپے کے فنڈز فراہم کئے جارہے ہیں۔

انہوں نے کہا کہ سڑکوں،سولنگ‘سیوریج پینے کے صاف پانی اور سوئی گیس کے منصوبے جاری ہیں‘ حکومت مہنگائی اور کرپشن پر کنٹرول کے لئے بھی سخت اقدامات کر رہی ہے ترقیاتی کاموں سے لوگوں کو روزگار کے مواقع بھی میسر آئیں گے۔ممبر قومی اسمبلی چوہدری عامر سلطان چیمہ‘صوبائی پارلیمانی سیکریٹری چوہدری فیصل فاروق چیمہ‘ ضلعی چیئرمین وزیر اعلیٰ شکایات سیل چوہدری فیصل جاویدگھمن نے تختی کی نقاب کشائی کرکے کارپٹ روڈ کی تعمیر کا افتتاح کیا۔