Live Updates

پیپلز پارٹی ، ن لیگ، ایم کیو ایم، پاک مسلم الائنس سے کارکنان کی پی ٹی آئی میں شمولیت

بلدیاتی قانون میں ترمیم کے بجائے قانون کو ختم کیا جائے، سندھ حکومت آئین کے ساتھ بار بار کھیلنے کا سلسلہ بند کرے،بلال غفار

جمعرات 3 فروری 2022 19:53

پیپلز پارٹی ، ن لیگ، ایم کیو ایم، پاک مسلم الائنس سے کارکنان کی پی ٹی ..

کراچی (اُردو پوائنٹ اخبارتازہ ترین - این این آئی۔ 03 فروری2022ء) پاکستان تحریک انصاف کراچی میں شمولیتوں کا سلسلہ تیز،مختلف سیاسی و سماجی رہنمااور کارکنان کی وزیراعظم عمران خان کے وژن کے ساتھ تحریک انصاف میں شمولیت۔ مسلم لیگ ن کے این اے 201 گھوٹکی کے سابق امیدوار سید عطا بخاری،ایم کیو ایم پاکستان گلشن ٹاؤن کے ذمہ دار سید امان شاہ اورشہزاد ،پاک مسلم الائنس کے مرکزی ترجمان سید عمر شاہ، پیپلز پارٹی کے محمد صفدر،سماجی رکن کاشف ظفر پی ٹی آئی میں شامل ہوگئے۔

پی ٹی آئی کراچی ریجن کے صدر و رکن سندھ اسمبلی بلال غفار نے رہنماوں اور کارکنان کا استقبال کیا پارٹی مفلر پہنایا۔ اس موقع پر حال ہی میں شمولیت کرنے والے ق لیگ کے سابق مرکزی سینئر نائب صدر غلام رضا چنا بھی موجود تھے۔

(جاری ہے)

اس موقع پر بلال غفار کا کہنا تھا کہ پی ٹی آئی میں شامل ہونے والے رہنماؤں اور کارکنان نے وزیراعظم کی قیادت پر اعتماد کا اظہار کیا ہے۔

شعور سے بیدار و سیاسی سمجھ رکھنے والے ملکی موجودہ صورتحال سے واقف ہیں۔پی ٹی آئی حکومت نے اقتدار کے اول روز سے مشکل چیلنجز کا سامنا کیا۔ ہمیں یقین ہے عمران خان کا کاروان مزید آگے بڑھے گا۔ پی ٹی آئی کے سندھ میں حکومت بنانے کیلئے حوصلے بلند اور ارادے پختہ ہیں۔ نئے شمولیت کرنے والے رہنماؤں کو پارٹی میں خوش آمدید کہتے ہیں۔ سندھ کیلئے تبدیلی کے سفر رہنماء کندھے سے کندھا ملا کر چلیں گے۔

دریں اثناء پی ٹی آئی کراچی کے صدر و رکن سندھ اسمبلی بلال غفار نے اپنے بیان میں کہا کہ وزیر اعلیٰ سندھ اپوزیشن کو جاہل سمجھتے ہیں اور جاہلانہ فیصلے خود کرتے ہیں۔ 2013 کے بلدیاتی قانون میں ترمیم کے بجائے قانون کو ختم کیا جائے۔ سندھ حکومت آئین کے ساتھ بار بار کھیلنے کا سلسلہ بند کرے۔ سندھ حکومت کی نیت میں جو فتور ہے اس سے عوام اچھی طرح واقف ہیں۔ سندھ حکومت کا بلدیاتی قانون ذاتی مفادات کے ارد گرد گھوم رہا ہے۔ نیا بااختیار بلدیاتی نظام صوبے کی ترقی کیلئے اہم ہے۔ سندھ کابینہ سے ڈھنگ کے فیصلے نہیں ہوتے تو گھر چلے جائیں۔ یہ حربے بلدیاتی الیکشن میں تاخیر کیلئے آزمائے جارہے ہیں۔