بل اینڈ میلنڈا گیٹس فاؤنڈیشن (BMGF) کے شریک چیئر مسٹر بل گیٹس کے ساتھ وزیر اعظم کی ٹیلیفونک گفتگو

لله*حکومت خصوصی ایمرجنسی رسپانس پلان کو فعال طور پر نافذ کر رہی ہے اور اس کی موافقت جاری رکھے گی،وزیراعظم

منگل 7 مارچ 2023 22:40

لله*اسلام آباد(اُردو پوائنٹ اخبارتازہ ترین - آن لائن۔ 07 مارچ2023ء) وزیر اعظم محمد شہباز شریف اور بل اینڈ میلنڈا گیٹس فاؤنڈیشن (BMGF) کے شریک چیئرمین مسٹر بل گیٹس کے درمیان آج ٹیلیفونک رابطہ ہوا۔ وزیراعظم نے بی ایم جی ایف کی جانب سے ملک میں پولیو کے خاتمے اور حفاظتی ٹیکوں، غذائیت اور مالیاتی شمولیت کو بہتر بنانے میں خاص طور پر ملک میں حالیہ سیلاب کے دوران پاکستان کو دی جانے والی قابل قدر مدد کو سراہا۔

وزیر اعظم نے ملک میں پولیو کے خاتمے کے لئے وفاقی وزیر صحت عبدالقادر پٹیل اور انکی ٹیم کی ان تھک کوششوں سے بل گیٹس کو آگاہ کرتے ہوئے انکی کوششوں کی تعریف کی. انہوں نے تعاون کے تمام جاری شعبوں میں فاؤنڈیشن کے ساتھ نتیجہ خیز شراکت داری کو مزید مستحکم کرنے کی پاکستان کی خواہش کا بھی اعادہ کیا۔

(جاری ہے)

وزیراعظم نے کہا کہ پاکستان ملک میں پولیو کی تمام اقسام کے خاتمے کے لیے پرعزم ہے۔

انہوں نے 2022 میں پولیو کے نئے کیسز کی رپورٹنگ پر تشویش کا اظہار کیا تاہم انہوں نے یہ بھی کہا کہ ستمبر 2022 سے پولیو کیسز میں وقفہ آیا ہے۔ دونوں رہنماؤں نے حکومت کے زیرقیادت دیگر پروگراموں پر بھی تبادلہ خیال کیا، جن میں BMGF کی مدد سے غذائی قلت اور سٹنٹنگ، حفاظتی ٹیکوں کی ضروری خدمات، مائیکرو پیمنٹ گیٹ وے RAAST، اور قومی بچت پروگرام کی ڈیجیٹلائزیشن شامل ہیں۔

گزشتہ سال کے تباہ کن سیلاب جس نے بڑے پیمانے پر نقل مکانی اور صحت کی دیکھ بھال کے بنیادی ڈھانچے کی تباہی کی وجہ سے پولیو کے قطرے پلانے کی جاری کوششوں کو بری طرح متاثر کیا تھا کا ذکر کرتے ہوئے وزیر اعظم نے کہا کہ حکومت خصوصی ایمرجنسی رسپانس پلان کو فعال طور پر نافذ کر رہی ہے اور اس کی موافقت جاری رکھے گی۔ بل گیٹس نے پولیو کے خاتمے کے لیے پاکستان کی کوششوں کو سراہتے ہوئے پولیو کے خاتمے کو یقینی بنانے کے لیے اپنی فاؤنڈیشن کی جانب سے پاکستان کے لیے مسلسل تعاون کا اعادہ کیا۔ دونوں رہنماؤں نے مشترکہ مقاصد پر مل کر کام جاری رکھنے پر اتفاق کیا