پی ایس ایل فائنل کا آغاز اچانک تاخیر کا شکار ہو گیا

لاہور (اردو پوائنٹ تازہ ترین اخبار ۔ 18 مارچ 2023ء ) پی ایس ایل فائنل کا آغاز اچانک تاخیر کا شکار ہو گیا۔ تفصیلات کے مطابق پاکستان سپر لیگ 8 کا فائنل لاہور قلندرز اور ملتان سلطانز کے درمیان قذافی اسٹیڈیم لاہور میں کھیلا جا رہا ہے۔ میچ کے آغاز کیلئے دونوں ٹیموں کے کھلاڑی جب میدان میں اترے تو قذافی اسٹیڈیم لاہور کی لائٹس اچانک بند ہو گئیں۔ بتایا گیا ہے کہ تکنیکی خرابی دور کرنے کی کوشش کی جا رہی ہے، لائٹس بحال ہونے کے بعد میچ کا آغاز ہو گا۔

واضح رہے دفاعی چیمپئن لاہور کے کپتان شاہین شاہ آفریدی نے ٹاس جیتنے کے بعد پہلے بیٹنگ کرنے کا فیصلہ کیا ہے، دونوں ٹیمیں گزشتہ برس کے ٹورنامنٹ میں بھی فائنلسٹ تھیں۔ ٹاس ہارنے والے ملتان سلطانز کے کپتان محمد رضوان نے کہا کہ چیمپئن ٹیموں کو ٹاس سے فرق نہیں پڑتا۔

(جاری ہے)

دونوں ٹیموں نے اپنے آخری میچ میں کھیلائی گئی پلئنگ الیون برقرار رکھی ہے۔

فائنل کی فاتح ٹیم دوسری مرتبہ پی ایس ایل چیمپئن بن جائے گی۔ جبکہ اگر لاہور قلندرز فتح رہی، تو پی ایس ایل کی تاریخ میں یہ پہلی مرتبہ ہو گا کہ ایک ٹیم مسلسل دوسرے سال چیمپئن بنی۔ اب تک اسلام آباد یونائیٹڈ واحد ٹیم ہے جسے 2 مرتبہ پی ایس ایل چیمپئن بننے کا اعزاز حاصل ہوا۔ چیمپئن ٹیم کو خوبصورت ٹرافی کے علاوہ 12 کروڑ روپے کی خطیر انعامی رقم ملے گی جبکہ رنرز اپ کو 4 کروڑ 80 لاکھ روپے ملیں گے۔

یہاں واضح رہے کہ ملتان سلطانز کوالی فائر میں لاہور قلندرز کو شکست دے کر فائنل میں پہنچی، جبکہ لاہور قلندرز ایلیمینیٹر 2 میں پشاور زلمی کو شکست دے کر فائنل میں پہنچی۔ گزشتہ 3 سالوں میں ملتان سلطانز اور لاہور قلندرز ٹورنامنٹ کی سب سے بہترین ٹیمیں بن کر سامنے آئی ہیں۔ ملتان سلطانز نے مسلسل تیسرے سال جبکہ لاہور قلندرز نے مسلسل دوسرے سال پی ایس ایل فائنل تک رسائی حاصل کی ہے۔