Live Updates

الیکشن اگر مقررہ وقت سے آگے گئے تو سمجھیں آئین ختم ہوجائے گا

آئین کی پاسداری کیلئے ہرطرح کی اےپی سی میں بیٹھنے کو تیار ہوں، الیکشن کی تاریخ مافیا کی سیاسی موت ہے، پی ٹی آئی کے امیدوار30 اپریل کے حساب سے انتخابی مہم جاری رکھیں گے۔ چیئرمین پی ٹی آئی عمران خان کی گفتگو

ثنااللہ ناگرہ منگل 28 مارچ 2023 19:11

الیکشن اگر مقررہ وقت سے آگے گئے تو سمجھیں آئین ختم ہوجائے گا

لاہور(اردوپوائنٹ اخبارتازہ ترین۔ 28 مارچ 2023ء) چیئرمین پی ٹی آئی عمران خان نے کہا ہے کہ الیکشن اگر مقررہ وقت سے آگے گئے تو سمجھیں کہ آئین ختم ہوجائے گا، پی ٹی آئی کے امیدوار 30 اپریل کے حساب سے انتخابی مہم جاری رکھیں گے، آئین کی پاسداری کیلئے ہر طرح کی اے پی سی میں بیٹھنے کو تیار ہوں۔ اے آروائی نیوز کے مطابق چیئرمین پی ٹی آئی عمران خان سے صدر سی پی این ای کاظم خان نے ملاقات کی۔

ملاقات میں گفتگو کرتے ہوئے عمران خان کہا کہ الیکشن اگر مقررہ وقت سے آگے گئے تو سمجھیں کہ آئین ختم ہوجائے گا۔پی ٹی آئی کے امیدوار 30اپریل کے حساب سے انتخابی مہم جاری رکھیں گے ۔آئین کی پاسداری کیلئے ہر طرح کی اے پی سی میں بیٹھنے کو تیار ہوں۔ پی ڈی ایم سیاسی اتحاد نہیں چوروں کا گروہ ہے ، الیکشن کی تاریخ مافیا کی سیاسی موت ہے۔

(جاری ہے)

عدالت پر الزام تراشی اور دباؤ میں لانا ن لیگ کا وطیرہ ہے، ن لیگ وہی جماعت ہے جس کے مسلح جتھے سپریم کورٹ پر حملہ آور ہوئے تھے۔

عمران خان نے الزام عائد کیا کہ میرے قتل کی سازش میں رانا ثناء اللہ کا کلیدی کردار ہے، سازش کے باقی 2 کرداروں کے نام پہلے ہی بتا چکا ہوں۔ میرے قتل کی تحقیقات کو سبوتاژ کرنے بھی تینوں کا اہم کردار ہے، رانا ثناء اللہ ایک بزدل آدمی ہے، قتل کی دھمکیوں اور ارادہ قتل کے خلاف قانونی چارہ جوئی کروں گا۔ رانا ثناء اللہ وزیرداخلہ نہیں بلکہ دہشتگرد مافیا کا رکن ہے، رانا ثناء اللہ کا کردار عابد شیر علی کے والد سے پوچھ لیں۔

دوسری جانب وفاقی وزیر داخلہ رانا ثناء اللہ نے اپنے بیان کی وضاحت دیتے کرتے ہوئے کہا کہ انہوں نے عمران خان کو جان سے مارنے کی دھمکی نہیں دی، ایک سیاسی بات کی تھی، میں نے عمران خان کے سیاسی وجود کی بات کی تھی، سیاست دان سیاسی بات ہی کرتا ہے۔وفاقی وزیر داخلہ نے کہا کہ چاروں صوبائی اسمبلیوں اور قومی اسمبلی کے الیکشن ایک ساتھ ہوں گے، صوبوں میں نگران سیٹ اپ کے بغیر ہونے والے الیکشن کے نتائج کو کوئی تسلیم نہیں کریگا، ایسے الیکشن ملک میں افرتفری کا سبب بنیں گے۔رانا ثناء اللہ نے کہا کہ عمران نیازی کے خلاف ابھی قانون حرکت میں نہیں آیا، عمران نیازی کا احتساب ہوگا، اب پی ٹی آئی میں سے بہت کچھ نکلے گا۔