اسپیکرقومی اسمبلی راجہ پرویزاشرف کی دستور پاکستان کی گولڈن جوبلی کی مناسبت سے منعقدہ عالمی آئینی کنونشن میں شریک، ایران، کرغستان اور لبنان کے پارلیمانی وفو د سے ملاقاتیں

اسلام آباد(اُردو پوائنٹ اخبارتازہ ترین - آن لائن۔ 11 مئی2023ء) قومی اسمبلی کے اسپیکرراجہ پرویزاشرف سے دستور پاکستان کی گولڈن جوبلی کی مناسبت سے منعقدہ عالمی آئینی کنونشن میں شریک، ایران، کرغستان اور لبنان کے پارلیمانی وفود نے جمعرات کے روز پارلیمنٹ ہائو س میں علیحدہ علیحدہ ملاقاتیں کیں ان ملاقاتوں میں خطے کے ممالک کو درپیش علاقائی اور عالمی چیلنجرز، گولڈن جوبلی کی عالمی کنونشن سمیت باہمی دلچسپی کے دیگر امور پر تبادلہ خیال کیا گیااسپیکر قومی اسمبلی نے آئین کی گولڈن جوبلی کی تقریب کے سلسلے میں قومی اسمبلی سیکرٹریٹ کے زیر اہتمام بین الاقوامی آئینی کنونشن میں شرکت پر عالمی مندوبین کا شکریہ ادا کیا۔

اس موقع پر اسپیکر نے کہا کہ پاکستان اور کرغیزستان کے ساتھ دوطرفہ تعلقات اہمیت کے حامل ہیں دونوں ممالک کے درمیان تعلقات کو جمہوریت اور سماجی بہبود کی باہمی اقدار کی بنیادوں پر استوار ہیں۔

(جاری ہے)

اسپیکر نے آئین کی گولڈن جوبلی تقریبات میں جمہوریہ کرغزستان کی شرکت کو سراہا۔ انہوں نے مزید کہا کہ پاکستان کرغزستان کے صدر کے آنے والے دورے کا پرجوش طور پر منتظر ہے، جس سے دونوں ممالک کے درمیان تعلقات بالخصوص توانائی اور مواصلات کے شعبے میں تعاون کو مزید فروغ ملے گی۔

اس موقع پر کرغستان کے وفد کے سربراہ مسٹر اتازوف نے اسپیکر قومی اسمبلی کے تاثرات کو سراہاہتے ہو کہا کہ کرغزستان ہمیشہ پاکستان کے ساتھ اپنے تعلقات کو بہت اہمیت دیتا ہے۔ انہوں نے 1995 میں شہید محترمہ بے نظیر بھٹو کے کرغز جمہوریہ کے دورے کی یادیں بھی شیئر کیں اور یہ دورہ کرغزستان کے لاکھوں لوگوں کی زندہ یاد ہے۔ انہوں نے کرغزستان کے دورے کی دعوت قبول کرنے پر قومی اسمبلی کے سپیکر کا شکریہ ادا کیا۔

بعد ازاں ایرانی پارلیمانی وفد نے پارلیمنٹ کی قومی سلامتی اور خارجہ پالیسی کمیٹی کے چیئرمین وحید جلال زادہ ممبر پارلیمنٹ کی قیادت میں سپیکر قومی اسمبلی راجہ پرویز اشرف راجہ پرویز اشرف سے بھی ملاقات کی ملاقات کے موقع پر سپیکر قومی اسمبلی راجہ پرویز اشرف نے کہا کہ ایران ایک بہادر قوم ہے جس نے حالیہ چیلنجوں کا بہادری سے مقابلہ کیا اور اتحاد و اتفاق سے ان چیلنجز کا مقابلہ کیا۔

انہوں نے آئین کی گولڈن جوبلی تقریب کے موقع پر قرآن پاک کے نادر نسخوں کی نمائش کے کامیاب انعقاد پر ایرانی سفارت خانے کا شکریہ بھی ادا کیا انہوں نے ایران سعودی عرب تعلقات کی بحالی کو پورے خطے کے لیے مثبت پیش رفت قرار دیا اس موقع پر ایران کی وفد کے سربراہ وحید جلال نے اظہار تشکر کیا اور کہا کہ ایران پاکستان کے ساتھ اپنے تعلقات کو بہت اہمیت دیتا ہے۔

مزید برآں، اسپیکر قومی اسمبلی نے ایرانی دورے کی دعوت کو گرم جوشی سے قبول کیا۔انہوں نے مختلف شعبوں، توانائی، مواصلات اور مذہبی سیاحت کے فروغ میں تعاون کو مضبوط بنانے کی ضرورت پر زور دیا۔ انہوں نے اس ضرورت پر زور دیا کہ علاقائی امن اور سلامتی کے لیے اجتماعی کوششیں ناگزیر ہیں۔ مزید برآں، قاسم ہاشم ممبر قومی اسمبلی لبنان نے بین الاقوامی آئینی کنونشن کے موقع پر پاکستان کی قومی اسمبلی کے سپیکر راجہ پرویز اشرف سے ملاقات کی۔

سپیکر راجہ پرویز اشرف نے کہا کہ پارلیمانی سفارت کاری ترقی پسند اور متحرک جمہوریت کا کلیدی عنصر ہے اور اس لیے دونوں فریقوں کے درمیان پارلیمانی روابط کو فروغ دینا ضروری ہے۔اس موقع پر انجینئر صابرحسین قائم خانی بھی موجود تھے۔۔۔۔۔اعجاز خان