Live Updates

مولانا فضل الرحمان کا سپریم کورٹ پر حملہ ناکام ہوا

انہیں شرمندگی کا سامنا کرنا پڑ رہا ہے،پی ٹی آئی کے ساتھ اتحاد قائم اور مضبوط ہے۔ترجمان جے یو آئی شیرانی

مقدس فاروق اعوان بدھ 17 مئی 2023 13:07

اسلام آباد (اردوپوائنٹ،اخبارتازہ ترین ۔ 17 مئی 2023ء) ترجمان جے یو آئی شیرانی کا کہنا ہے کہ مولانا فضل الرحمان کا سپریم کورٹ پر حملہ ناکام ہوا ہے۔انہیں شرمندگی کا سامنا کرنا پڑ رہا ہے۔ترجمان نے مزید کہا کہ پی ٹی آئی کے ساتھ اتحاد قائم اور مضبوط ہے۔ناکام سیاست کو بچانے کے لیے جھوٹ کا سہارا لیا جا رہا ہے۔ ترجمان جے یو آئی شیرانی نے مزید کہا کہ سوشل میڈیا پر وائرل خط جعلی اور بے بنیاد ہے۔

قبل ازیں جمعیت علماء اسلام ش کے مرکزی امیر سابق چیئرمین اسلامی نظیریاتی کونسل مولانا محمد خان شیرانی نے کہاہے کہ حکمراں ٹولہ اپنے نا جائز اقتدار کو طول دینے کیلئے ہر غیر جمہوری و غیر آئینی حربے استعمال کرتے ہیں، چیف جسٹس سپریم کورٹ کی جانب سے 14اپریل کے فیصلے کو برقرار رکھنے کے واضح اعلان سے حکومتی حلقوں میں کھلبلی مچ گئی ہے۔

(جاری ہے)

مرکزی سیکرٹری جنرل حافظ احمد علی سے ٹیلی فونک گفتگو میں انہوں نے کہا کہ آئین سے انحراف کسی بھی لحاظ سے ملکی مفاد میں نہیں ہے۔ معاشی ، سیاسی اور آئینی بحران کا واحد حل شفاف الیکشن ہیں، حکمراں کچھ بھی کرلیں انتخابات کرانا پڑیں گے، جتنی جلد الیکشن ہونگے پی ڈی ایم ساکھ اتنی بچ جائے گی، تاخیری حربوں سے پی ڈی ایم خود سیاسی خودکشی کر رہی ہیں، عمران خان خوف کے حصار سے باہر نکلیں، وہ جتنا عدالتوں میں پیش ہونگے اتنا حکمرانوں پر دبائو بڑھے گا، پی ٹی آئی کومزاکرات سے علیحدہ نہیں ہونا چاہئے، ایران سعودی عرب میں سفارتی تعلقات کی بحالی ملت اسلامیہ کیلئے نیک شگون ہے ، اس موقع سے فائدہ اٹھا کر اسلامی ممالک کے درمیان تعلقات مزید مضبوط کئے جائیں، پاکستان میں آکر دانشمندسیاسی قیادت ہوتی تو اس تاریخی موقع سے فائدہ اٹھایا جا سکتا تھا، انہوں نے پاکستان کے تمام مکاتب فکر کے علماء سے اپیل ہے اتحاد بین المسلمین کی خاطر تمام متفقہ امور کو اپنا کر ملت پاکستان کے اتحاد کیلئے موثر کردار ادا کریں۔