-افواج پاکستان کے شہداء ہمارا فخر ہیں اور ان کی یادگاریں قومی اثاثہ ہیں: بلیغ الرحمان

>لاہور (اُردو پوائنٹ اخبارتازہ ترین - آن لائن۔ 29 مئی2023ء) گورنر پنجاب محمد بلیغ الرحمان سے گورنر ہاؤس لاہور میں چیئرمین سیاسی امور مرکزی جمعیت اہل حدیث پاکستان علامہ محتشم الٰہی ظہیر اور کوآرڈینیٹر سیاسی امور محمد علی یزدانی نے ملاقات کی۔ ملاقات میں تعلیم اور ملک کی موجودہ صورتحال پر تبادلہ خیال کیا گیا۔ اس موقع پر گفتگو کرتے ہوئے گورنر پنجاب محمد بلیغ الرحمان نے کہا کہ سابق وزیراعظم پاکستان نواز شریف نے بین الاقوامی دباؤ کے باوجود 28 مئی کو ملکی سلامتی اور دفاع کو ناقابل تسخیر بنا دیا۔

انہوں نے کہا کہ ملک کے لیے جانوں کا نذرانہ پیش کرنے والے سیکیورٹی فورسز اور افواج پاکستان کے شہداء ہمارا فخر ہیں اور ان کی یادگاریں قومی اثاثہ ہیں۔ گورنر پنجاب نے کہا کہ مسلم لیگ (ن) کے دور میں ملک ترقی اور خوشحالی کی جانب گامزن تھا، مہنگائی کی شرح کم اور جی ڈی پی بلند شرح سے بڑھ رہی تھی۔

(جاری ہے)

انہوں نے کہا کہ مسلم لیگ (ن) نے اپنے دور حکومت میں ملک میں تعلیمی اداروں، ہسپتالوں اور موٹرویز کا جال بچھا دیا۔

گورنر پنجاب نے کہا کہ نوجوان نسل قوم کا اثاثہ ہے اور اساتذہ انہیں سائنسی تعلیم کے ساتھ دینی تعلیمات سے بھی آگاہ کریں اور ان کی کردار سازی پر بھی توجہ دیں۔ انہوں نے کہا کہ تعلیمی اداروں کو ایسے نوجوان پیدا کرنے چاہئیں جو علامہ اقبال کے افکار کے مطابق بہادر اور اعلیٰ اخلاق کے حامل ہوں۔ گورنر پنجاب نے مزید کہا کہ حکومت عام آدمی کو ریلیف فراہم کرنے کے لیے ہر ممکن اقدامات کر رہی ہے۔

انہوں نے کہا کہ انشاء اللہ بہت جلد تمام بحرانوں پر قابو پالیا جائے گا۔ اس موقع پر چیئرمین سیاسی امور مرکزی جمعیت اہل حدیث پاکستان علامہ محتشم الٰہی ظہیر نے کہا کہ جمعیت اہل حدیث پاکستان تحریک انصاف کی ریاست دشمن سرگرمیوں کی شدید مذمت کرتی ہے۔ سیاسی امور کے رابطہ کار محمد علی یزدانی نے کہا کہ شہدائ کی یادگاروں کی بے حرمتی اور فوجی تنصیبات پر حملوں کی منصوبہ بندی کرنے والوں کو کڑی سے کڑی سزا دی جائے۔

دریں اثناء گورنر پنجاب محمد بلیغ الرحمان نے گورنر ہاؤس لاہور میں روزنامہ آفتاب کے بانی و رہنما اور آل پاکستان نیوز پیپرز سوسائٹی کے مرکزی رہنما ممتاز احمد طاہر کی خدمات کو خراج تحسین پیش کرنے کے لیے ایک تعزیتی ریفرنس کی تقریب میں بطور مہمان خصوصی شرکت کی۔ تقریب سے خطاب کرتے ہوئے گورنر پنجاب محمد بلیغ الرحمان نے کہا کہ ممتاز احمد طاہر (مرحوم) اپنی ذات میں ایک ادارہ تھے۔

گورنر پنجاب نے کہا کہ ممتاز احمد طاہر (مرحوم) نے اے پی این ایس کے پلیٹ فارم سے علاقائی اخبارات کی ترقی و ترویج کے لیے انتھک محنت کی۔ انہوں نے کہا کہ انہوں نے ہمیشہ پسماندہ اور کمزور طبقات بالخصوص جنوبی پنجاب کے محروم طبقات کے مسائل کے حل کے لیے آواز بلند کی۔ گورنر پنجاب نے کہا کہ کسی بھی چیز کے بارے میں رائے قائم کرنے سے پہلے حقائق جاننا اور تحقیق کرنا بہت ضروری ہے۔

انہوں نے مزید کہا کہ سچائی میں ہی ابدی کامیابی ہے۔ گورنر پنجاب محمد بلیغ الرحمان نے کہا کہ مثبت معاشرے کی تشکیل کے لیے اپنی خامیوں اور دوسروں کی خوبیوں کو دیکھنا ضروری ہے۔ انہوں نے کہا کہ بطور گورنر ان کی ذمہ داری ہے کہ وہ ان لوگوں کی حوصلہ افزائی کریں جو معاشرے کی بہتری کے لیے اچھا کام کر رہے ہیں۔ گورنر پنجاب نے کہا کہ معاشرے میں مثبت رویوں کو فروغ دینے کے لیے ہمیں اپنا کردار ادا کرنا ہوگا، تب ہی ہم ایک ترقی یافتہ اور خوشحال معاشرہ تشکیل دے سکتے ہیں۔

تقریب سے مجیب الرحمن شامی، امتنان شاہد، جمیل اطہر، سابق وفاقی وزیر حامد سعید کاظمی، سابق وزیراعظم یوسف رضا گیلانی سمیت دیگر نے بھی خطاب کیا اور ممتاز احمد طاہر (مرحوم) کی صحافتی خدمات کو خراج تحسین پیش کیا۔ تقریب میں سابق وزیراعظم پاکستان سید یوسف رضا گیلانی، وزیراعلیٰ پنجاب کے مشیر برائے قانون و پارلیمانی امور کنور دلشاد، اے پی این ایس کے صدر ناز آفرین، سیکرٹری اے پی این ایس مجیب الرحمان شامی، جمیل اطہر اور صحافیوں نے شرکت کی۔ تقریب میں اخباری صنعت اور میڈیا سے تعلق رکھنے والے افراد نے بڑی تعداد میں شرکت کی