آرمی چیف کا جنوبی وزیرستان کے علاقے آسمان منزہ کا دورہ

سکیورٹی صورتحال اور انسداد دہشت گردی آپریشنز پر بریفنگ دی گئی،پاکستان میں مکمل امن و استحکام واپس آئے گا،جنرل عاصم منیر

عبدالجبار بدھ 23 اگست 2023 17:38

آرمی چیف کا جنوبی وزیرستان کے علاقے آسمان منزہ کا دورہ

جنوبی وزیرستان (اردوپوائنٹ اخبارتازہ ترین ۔ 23 اگست 2023ء) آرمی چیف کا کہنا ہے کہ پاکستان میں مکمل امن اور استحکام واپس آئے گا۔ تفصیلات کے مطابق آرمی چیف جنرل عاصم منیر نے جنوبی وزیرستان کے علاقے آسمان منزہ کے قریب شیروانگی کا دورہ کیا،آرمی چیف کو سکیورٹی صورتحال اور انسداد دہشت گردی آپریشنز پر بریفنگ دی گئی۔ آئی ایس پی آر کے مطابق آرمی چیف نے افسروں اور جوانوں سے ملاقات کی،جنرل عاصم منیر نے دہشت گردی کے خلاف جنگ میں افسروں اور جوانوں کے عزم کو بھی سراہا۔

آرمی چیف نے کہا کہ شہداء ہمارا فخر ہیں اور انکی قربانیاں رائیگاں نہیں جائیں گی۔دہشت گردوں اور ان کے سہولت کاروں کو کسی صورت نہیں چھوڑا جائے گا۔ جنرل عاصم منیر کا کہنا تھا کہ دہشت گرد،سہولت کار اور ان کے ساتھی ملک دشمن ایجنڈے پر عمل پیرا ہیں۔

(جاری ہے)

پاکستان میں مکمل امن و استحکام واپس آئے گا،دہشت گردوں اور ان کے سہولت کاروں کو ریاست پاکستان کے سامنے سرنڈر کرنا ہو گا۔

یاد رہے کہ گزشتہ روز جنوبی وزیرستان کے علاقے آسمان منزہ میں 6 جوان شہید ہو گئے تھے۔ جنوبی وزیر ستان کے علاقے آسمان منزہ میں سکیورٹی فورسز اور دہشت گردوں کے درمیان فائرنگ کا تبادلہ ہوا تھا،سکیورٹی فورسز نے مؤثر طریقے سے دہشت گردوں کے ٹھکانے کا پتہ لگایا۔ فائرنگ کے تبادلے میں 4 دہشت گرد مارے گئے اور 2 دہشت گرد زخمی ہوئے تھے۔ آئی ایس پی آر کی جانب سے جاری بیان میں کہا گیا تھا کہ فائرنگ کے نتیجے میں 6 جوان بھی بہادری سے لڑتے شہید ہوئے،علاقے میں دہشت گردوں کیخلاف کلیئرنس آپریشن جاری رہا۔

آئی ایس پی آر نے کہا کہ مسلح افواج دہشت گردی کے خاتمے کیلئے پر عزم ہیں،بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔ جبکہ پاکستان رینجرز نے بھارت کی طرف سے اسمگلنگ کی بڑی کارروائی ناکام بنا ئی تھی، 29 جولائی سے 3 اگست تک در اندازی کی کوششوں میں 6 بھارتی اسمگلرز کو گرفتار کیا گیا ۔