لله* قوم کی توقع ہے نئے چیف جسٹس اعلیٰ عدلیہ کے چہرے اور کردار کو درست سمت پر لائیں گے،سردارظفرحسین خاں

منگل 19 ستمبر 2023 19:50

فیصل آباد(اُردو پوائنٹ اخبارتازہ ترین - آن لائن۔ 19 ستمبر2023ء) جماعت اسلامی کے صوبائی نائب امیرسردارظفرحسین خاں نے کہاہے کہ قوم کی توقع ہے کہ نئے چیف جسٹس اعلیٰ عدلیہ کے چہرے اور کردار کو درست سمت پر لائیں گے۔ عدلیہ کی تقسیم اور جانبدارانہ اسلوب کے گہرے تاثر کو ختم کرنا ہوگا۔سیاسی، آئینی، انتخابی مقدمات، پٹیشنز پر سپریم کورٹ کو مستقل بنیادوں پر میکنزم بنانا ہوگا ۔

سپریم کورٹ کے تمام معزز جج حضرات کو بھی اپنا رویہ، اسلوب بدلنا ہوگا۔ آئین و قانون کی بالادستی کے لیے صاف ستھرا کردار ادا کیا جائے۔انہوں نے کہا کہ 9 مئی کے ناپسندیدہ واقعات نے سیاست، ریاست اور قانون کے نفاذ میں جوہری تبدیلیاں پیدا کی ہیں۔ سیاسی، جمہوری محاذ پر لاقانونیت، عدم برداشت اور انتقامی سیاست ہمیشہ سیاست دانوں اور جمہوریت کے لے زہرِ قاتل ثابت ہوئی ہے جس سے ریاستی طاقتوں کو ہر طرح کے اقدام اور اندھی طاقت کے استعمال کا حق مل جاتا ہے۔

(جاری ہے)

قومی سیاسی قیادت کو سیاسی اقتصادی بحرانوں کے خاتمہ کے لیے قومی ترجیحات پر قومی ڈائیلاگ کرنا ہوگا ورنہ سیاسی قوتوں کے ہاتھ سے سب کچھ پھسل جائے گا ۔ انہوںنے کہاکہ پٹرول کی قیمتوں میں ہولناک اضافہ اور بجلی بلوں میں ناقابل برداشت اضافہ سے عام آدمی سے زندہ رہنے کا حق چھین لیا گیا ہے ۔ نگران حکومت اور اِس پر بالادست اسٹیبلشمنٹ کو احساس ہی نہیں کہ عام آدمی کس حالت اورکسمپرسی کا شکار ہے۔ جماعت اسلامی عوام کو لاوارث نہیں چھوڑے گی۔ عوام کے دکھوںاور احساسات کی ترجمانی کے لیے پورے ملک میں احتجاج جاری رہے گا۔ چاروں گورنر ہاؤسز کے باہر پُرامن دھرنے اور احتجاج سنگ میل بنیں گے۔ مہنگائی سے ستائے عوام پہیہ جام اور اسلام آباد لانگ مارچ کے لیے تیار ہیں