پی ٹی آئی رہنما عثمان ڈارکی گمشدگی کا مقدمہ درج کرنے کا حکم

بدھ 20 ستمبر 2023 20:45

کراچی (اُردو پوائنٹ اخبارتازہ ترین - آن لائن۔ 20 ستمبر2023ء) سندھ ہائیکورٹ نے پی ٹی آئی رہنماء عثمان ڈار کی کراچی سے حراست میں لیے جانے کے بعد گمشدگی کیخلاف درخواست پر پولیس کو مقدمہ درج کرکے 3 اکتوبر کو رپورٹ پیش کرنے کا حکم دیدیا۔ہائیکورٹ میں پی ٹی آئی رہنمائ عثمان ڈار کی کراچی سے حراست میں لیے جانے کے بعد گمشدگی کیخلاف درخواست کی سماعت ہوئی۔

متعلقہ پولیس افسر نے بتایا کہ عثمان ڈار کی گمشدگی کا مقدمہ درج کرنے کے لیے درخواستگزار نے پولیس سے رجوع ہی نہیں کیا۔

(جاری ہے)

درخواستگزار کے وکیل نے موقف دیا کہ ہم نے پہلے دن ہی عثمان ڈار کی گمشدگی سے متعلق درخواست جمع کرادی تھی۔ سرکاری وکیل نے موقف دیتے ہوئے کہا کہ درخواستگزار چاہیں تو 154 کے تحت پولیس کواپنا بیان ریکارڈ کراسکتے ہیں۔ عثمان ڈار پولیس کی تحویل میں نہیں ہے۔درخواستگزار کے وکیل نے موقف اپنایا کہ نگران وزیر داخلہ حارث نواز نے ٹی وی ٹاک شو میں اعتراف کیا عثمان ڈار پولیس کی تحویل میں ہیں۔ اب پولیس کہتی ہے عثمان ڈار کو حراست میں نہیں لیا گیا۔عدالت نے پولیس کو عثمان ڈار کی گمشدگی کا مقدمہ درج کرکے 3 اکتوبر تک رپورٹ پیش کرنے کا حکم دیدیا۔