نوازشریف نے 2014میں سلوگن دیا تھا ، ووٹ کو عزت دو، کیا اب دے رہے ہیں،خورشیدشاہ

بلاول بھٹو وزیراعظم بننے کے اہل ہیں،آصف علی زرداری کے بیان کوبڑھا چڑھا کرپیش کیا گیا،18 ویں ترمیم پہلے ہوتی تو بنگلادیش نہ بنتا،میڈیا سے گفتگو

پیر 27 نومبر 2023 14:30

سکھر(اُردو پوائنٹ اخبارتازہ ترین - این این آئی۔ 27 نومبر2023ء) پاکستان پیپلزپارٹی کے سینئررہنما اور سابق اپوزیشن لیڈرخورشیداحمد شاہ نے کہا ہے کہ نوازشریف نے 2014میں سلوگن دیا تھا ، ووٹ کو عزت دو، کیا اب دے رہے ہیں، آپ کے لوگ تو کہہ رہے ہیں کہ ہم اسٹیبلشمنٹ کے لوگ ہیں، ن لیگ والے پھر چیئرمین پی ٹی آئی کو کیوں برا کہتے ہیں ،بلاول بھٹو زرداری وزیراعظم بننے کے اہل ہیں،آصف علی زرداری کے بیان کوبڑھا چڑھا کرپیش کیا گیا،18 ویں ترمیم پہلے ہوتی تو بنگلادیش نہ بنتا۔

سکھر میں میڈیا سے گفتگو کرتے ہوئے خورشید شاہ نے کہاکہ بلاول بھٹو وزیر اعظم کے امیدوار ہیں،آصف زرداری نے جو کہا اسے سمجھنے کی ضرورت ہے، پارٹی کا فیصلہ سی ای سی کرتی ہے، بعض تناظر میں آصف زرداری نے ایسا کہا ہے کہ وہ امیدوار نہیں ہیں۔

(جاری ہے)

انہوں نے کہاکہ ہم کسی پر دبائو ڈال کر سیاست نہیں کرتے، 55 سال سے اصولوں کی سیاست کر رہے ہیں، روٹی، کپڑا اور مکان ہمارا منشور ہے۔

ہمارے لیڈرنے جو وعدے کیے وہ پورے کیے ، کوئی اور جماعت بتا دیں جس نے اپنے منشور پر عمل کیا ہو، ایم کیو ایم اقتدار میں رہی اب ووٹ کیلئے جا رہی ہے تو کچھ ڈرامہ تو کرے گی۔خورشید شاہ نے کہاکہ نواز شریف کہتے ہیں کہ اسٹیبلشمنٹ ہماری ہے، چیئرمین پی ٹی آئی بھی ایسے ہی کہتے تھے۔ اسٹیبلشمنٹ ایک ادارہ ہے جو ہر طبقے کا ہے۔رہنما پیپلزپارٹی نے کہاکہ سندھ میں ایک بندرگاہ ہے،جہاں سے ملک بھر میں تجارت ہوتی ہے مگر سندھ میں ایک موٹروے نہیں بنائی گئی، سندھ میں کوئلے سے 2600 میگاواٹ بجلی پیدا ہورہی ہے، سندھ میں کوئلے سے پیدا ہونے والی بجلی20 ہزار میگاواٹ تک جائے گی مگر سندھ کی گیس بند کردی گئی۔

خورشید شاہ نے کہا کہ 18 ویں ترمیم کے بعد دیواروں پر لکھے صوبائی حقوق کے نعرے ختم ہوئے، یہ ترمیم پہلے ہوتی تو بنگلادیش نہ بنتا۔