ح*مقبوضہ کشمیر کا مقدمہ عالمی عدالت میں لیجایا جائے، مشعال ملک مطالبہ

اتوار 10 دسمبر 2023 18:10

غ*اسلام آباد (اُردو پوائنٹ اخبارتازہ ترین - آن لائن۔ 10 دسمبر2023ء) نگران وزیر مملکت مشعال ملک نے کہا کہ مقبوضہ کشمیر کے مقدمے کو عالمی عدالت میں لیجایا جائے۔ گزشتہ روز اسلام آباد میں ہیومن رائٹس کونسل کے زیراہتمام کشمیر کانفرنس کی تقریب سے خطاب کرتے ہوئے انہوں نے کہا کہ مسئلہ کشمیر کو اقوام متحدہ کی قراردادوں کے مطابق حل کرنا چاہئے، بھارت مقبوضہ کشمیر میں انسانی حقوق کی شدید خلاف ورزیاں کر رہا ہے۔

(جاری ہے)

مشعال ملک نے کہا کہ بھارت مقبوضہ کشمیر میں آبادی کے تناسب کو خراب کر رہا ہے، عالمی برداری مسئلہ کشمیر کو حل کرنے میں سنجیدگی کا مظاہرہ کرے، بھارت نے مقبوضہ کشمیر میں لاکھوں افراد کو شہید کیا، انسانی حقوق کے عالمی دن پر مقبوضہ کشمیر کے حوالے سے آواز بلند کرنے کی ضرورت ہے۔نگران وزیر مملکت نے کہا کہ بھارت مقبوضہ کشمیر میں معصوم کشمیریوں کی نسل کشی کر رہا ہے، مقبوضہ کشمیر میں انسانی حقوق نہیں ہیں، مقبوضہ کشمیر اس وقت دنیا کی سب سے بڑی جیل ہے، بھارتی فورسز انسانی حقوق کی سنگین خلاف ورزی کر رہی ہیں۔مشعال ملک نے کہا کہ مقبوضہ کشمیر کے مقدمے کو عالمی عدالت میں لے کر جانے کی ضرورت ہے، کشمیر پاکستان کی شہ رگ ہے۔