مسلم لیگ ن اور آئی پی پی کی ملاقات دو طرفہ خواہش پر ہوئی، فیاض الحسن چوہان

اتوار 10 دسمبر 2023 22:00

اسلام آباد(اُردو پوائنٹ اخبارتازہ ترین - این این آئی۔ 10 دسمبر2023ء) استحکام پاکستان پارٹی کے رہنما فیاض الحسن چوہان نے کہا ہے کہ نوازشریف تمام سیاسی جماعتوں کو ساتھ لیکر چلنے کی پلاننگ کر رہے ہیں،مسلم لیگ ن اور آئی پی پی کی ملاقات دو طرفہ خواہش پر ہوئی۔ٹی وی پروگرام میں گفتگو کرتے ہوئے فیاض الحسن چوہان نے کہا ہے کہ کوئی سیاسی جماعت اکثریت لینے کی پوزیشن میں نہیں ہے ، وفاق اور پنجاب میں ن لیگ اور آئی پی پی کی حکومت ہو گی ۔

انہوں نے کہا کہ مسلم لیگ ن اور آئی پی پی کی ملاقات دو طرفہ خواہش پر ہوئی، نواز شریف موجودہ حالات میں اچھے انداز میں اپنے پتے کھیل رہے ہیں۔انہوںنے کہاکہ نوازشریف تمام سیاسی جماعتوں کو ساتھ لیکر چلنے کی پلاننگ کر رہے ہیں،آئی پی پی ایک الیکٹیبلز پر مشتمل ہے، سب لوگوں کو ساتھ لیکر ایک ایسی حکومت بنائی جائے کہ معیشت کو اپنے پائوں پر کھڑا کیا جاسکے۔

(جاری ہے)

انہوںنے کہاکہ پاکستان کو اس وقت معیشت کی بقا کے چیلنج کا سامنا ہے، تحریک فساد کی وجہ سے پاکستان معاشی طور پر تباہ ہو چکا ہے۔فیاض الحسن چوہان نے کہا کہ 20سے 25قومی اسمبلی اور45کے قریب صوبائی اسمبلی پر ایڈجسٹمنٹ کی خواہش ہے،دونوں پارٹیوں کی طرف سے تین تین افراد پر مشتمل کمیٹی بن چکی ہے۔انہوںنے بتایاکہ الیکشن میں ہم اپنے اپنے انتخابی نشان پر الیکشن لڑیں گے، آئی پی پی کو کبھی بھی کسی سیاسی جماعت کا متبادل نہیں کہا، اگلے 4،5دن میں ساری چیزیں فائنل ہو جائیں گی۔ایک سوال کے جواب میں رہنما آئی پی پی نے کہا کہ وزیراعلیٰ پنجاب کیلئے علیم خان ہمارے امیدوار ہوں گے۔